Doordarshan cameraman aser police 2 Maoist-i tepset

New Delhi, Mongputeni/October 30 (Agencies): Sangtennü anepdang Dantewada kübok Sameli tesem anasa Maoist puri meita atar amakba mapang police ana aser Doordarshan cameraman ka ta tepsetogo. Police ana ya ka ASI Rudra Pratap aser constable Manglu ta jangjaogo aser Doordarshan cameraman ya Acchutanand Sahu ta ajangjaogo.
‘Ni kü medemer kü jakdang laoba nguogo,” ta arishi küm 37 tain osangbener Dheeraj Kumar-i ashi. Pa iba lendong nung taküm jenboa liasü.
Maneni iba lendong nung Doordarshan osangbener ka jenbo aser police ana tashi yirua liasü.
Dheeraj Kumar ya Bihar kübok Begsurai district nungi lir aser pa Doordashan atema inyaker. Parnok Sameli nung CRPF camp nungi km 5 shi pilar aliba Nilwaya tesemi oya aliba mapang nung iba lendong atalok.
“Onoki Nilwaya nung polling station tasen ka yangluba osang agitsü asoshi oya liasü, kong 1998 küm nungi vote magütsüi arua liasü,” ta Dheeraj-i ashi.
Lendong atalokli CRPF pur nem osang agütsü aser idangjisa parnok iba tesemi aritepa ao.
Osangbenertem kechi atema oya liasü ibaji jangjatsü asoshi merangdar. Maoist pur jakla shidakba temai adokdar. Onoki iba ken o ya bushisüngdangtsü aser iba dak sendakba nung asenok ajak longjemer inyaktsüla,” ta Deputy Inspector General P Sundarraj-i ashi.
Union Information and Broadcasting minister Rajyavardhan Rathore-ia iba inyakyim aitsüogo.
“Onok cameraman-baer kinungertem den dena lir. Onoki par kibong anepalutsü. Onoki tasütait osangbenertem nem tenüngsang agütsür shirnoki iba amala lendong aketba tesemi osang agitsü asoshi aoer,” ta minister-i ashi.
Asükhu lemsatepba tweet nung Prasar Bharati-i, public broadcaster-i, cameraman Achyuta Nanda Sahu, reporter Dhiraj Kumar aser light assistant Mormukt Sharma nunger densema election osang agitsü asoshi camera team ka yoka liasü, ta ashi.