Naga nunger lemsar melili saka longjemdi

RCEMPA Hall, Jotsoma nung Naga Club president Krurovi Peseyie (abelen)-i o jembidang agiba noksa angur. (Achiji) Naga Club Centenary celebration committee züngsemtem den kin hoho lennirtem aser o jembirtem agiba angur. (Kohima, October 30)

Jotsoma, Mongputeni (October) 30 (TYO): Naga Club tenteter küm 100 ajungba bilemteta tanü RCEMPA Hall, Jotsoma nung lokti sentong ka ayonga agi.
Züngsem 20 agi akümba Naga Club-i January 10, 1929 nung British Statutory Commission nem mezüngbuba Naga Political Memorandum agütsü. Iba nung “Onok Hindu nunger mesüra Mohammedan nunger den sendaktepa mali, anungji akhidang nungi aruba ama onok sasa liyonga odakjang” ta zülur agütsü.
Naga Club indang Organising Committee of Centenary Celebration-i iba Lead-in General Public Meeting ayong aser Chakhesang Public Organisation, Lotha Hoho, Pochury Hoho, Sumi Hoho, Central Nagaland Tribes Council, Naga Council Dimapur aser ACAUT nungi teshimtet nisungtem aden.
Küm 100 ajungba benjungmung tongtibaji November 29 nü Local Ground, Kohima nung amungtsü.
Naga nunger telok, kin aser tentet tenüng amer lemsar melili, saka asen temetentem kümzüka ayutsü aser ola adoktsü atema asenok ajak longjemdi, ta tanü sentong nung jembirtemi ayongzük.
Naga Club President, Krurovi Peseyie-i okila jembidang Naga Club tenzükertem aser 1929 nung Naga National political memorandum nung sign asür nem tenüngsang agütsü.
“Naga Club tenzükertemji azüngtsü-zülutsü junga memetetertem sür alitsü akok. Ajisüaka, parnoki kanga dang shisa kaa Naga nunger yimten putiotsü ken o jembi. Parnok ket nung peria meliaka, parnok temulung aser tangatetba nung takar liasü aser iba jagi parnoki ajemalua Naga Linük tamendakdak indang senmang bushitet” ta Peseyie-i ashi.
“Asenoki Naga club indang record tem reprangdangra, Naga club ya kodanga manen, saka mapang kar nung inyaksangshi melii aruba angutsü. Naga Club küm 100 ajungtsü aliba atema Naga nunger tain kar longjemer tebilembatem lemsatepba sülen June 2, 2017 nü Naga kintem den senden ka amen. Sendenji Naga Club Building Kohima nung amen aser adhoc inyakyim nung Naga club indang ketdangpurtem shim aser August 17, 2018 nü regularized asü,” ta Naga Club President-isa metetdaktsü.
“Naga Club tenzükertem aser 1929 indang memorandum nung sign asürtem tushitsü dalang aser teti bilemtettsü” ta paisa shisem.
Sentong nung Naga Club (1964-1969) Caretaker aser taoba Rajya Sabha MP, Khyomo Lotha-ia o jembidang, “Naga Club building ya tang alidak masü saka old Kohima Town Committee (present Ozone Café) nung liasü” ta menungra bilemtetba olen ka lemsatep.
Naga Club kiji kanga majung liasü aser iba jagi tain kar dang nungi tenla meshia yanglushi aser idangji ni ketdangsüa reprang, ta paisa ashi.
“Onok mapang nisung kar dang sentep, saka tanü yamai telok tulu sentepa angudang ni nüktzü alur. Onok mapang züngsem ishika dang asü aser registered züngsem maliasü. Ki tazüng ka dang liasü saka ni iba Naga Club mesamadaktsütsüla ta angateta inyak” ta Khyomo Lotha-isa shisem.
Naga Club tenzükertemi tentettsüba ama club mesama lir aser Naga Club indang senmang telok shinga nem-a magütsü, ta paisa metetdaktsü.
Iba sentong nung Niketu Iralu, Founder Principal Emeritus Patkai Christian College (Autonomous), Rev. Dr Tuisem Shishak aser Joint Christian Forum, Nagaland Vice President, Rev. Dr N Paphino nunger den kin hoho aser mulungtet telok balala nungi lennirtemi o jembi.