AFC Asian Cup sülen Lippi-i China mapa toktsütsü

Mongputeni/October 31, 2018 (Agencies): China national football team coach Marcello Lippi-i taruba küm Aenjeti/Jan nung pa contract tembangba sülen tenangzüktepba tasen meyanglutsü, ta state media sangdong ka ajanga metetdaktsü.
Monaco nung football awards sentong ka nung jembidang Lippi-i ashiba agi, pa bendanglen küm 6 tashi inyakba sülen pa par kibong dangi meyipa oner, ta CGTN sangdong ka ajanga metetdaktsü.
Italy nunger coach kübok Chinese team-i kangajungabo masaya aser parnok Russia nung World Cup asayatsü atema qualify mesütet.
“Ni junga inyakogo aser onok kanga tajungba mesüaka tajungba kümogo, kechiyong tetenzükdang jenjang kanga tekübokba nung liasü,” ta pai ashi.
Asian Cup, ya regional football asayamung ka lir aser iba ya Aenjeti/Jan nung United Arab Emirates nung asayatsü. China den Lippi tenangzüktepba yanglur aliba Aenjet/Jan tatem nung tembangtsü.
China national team-i pa melena head coach tanga ka angu asü manguar ajibo ano tang tashi mejangjai lir. Chinese Football Association otongdar kati iba dak sendakba nung lemsateptsüsa kecha osang mali ta shiogo.
Lippi lenisüba kübok Juventus-i Series A title pongu aser 1996 küm Champions League kokogo. Ajidang masü pa lenisüba kübok Italy-i 2006 nung World Cup koka liasü.
Pa Italy toktsür küm trok tejakdang mezüngbuba Guangzhou Evergrande mapa agizük aser parnok den külemi pai Chinese Super League titles asem tashi kokogo.
Lippi-i China national team coach mapa 2016 küm belenzük aser pa ya alima nung international coach tem rongnung sen timtiba aazükba (USD million 23 nungi 27 tashi) coach ka ta sangdonga liasü.