Tatsüka ajanga 2020 Olympics Marathon dak kongshitsü akok

Mongputeni/October 31, 2018 (Agencies): Japan nunger doctor telok kati Olympic ayongertem dang Tokyo 2020 marathon anepdang 5:30 nungibo tenzüktsü asoshi mepeshiogo. Parnoki ashiba agi, parnoki teyuba ama minyakra heatstroke ajanga tasüba dena ajurutsü akok.
Tatsük ajanga Olympic games jangjongtsü akok ta jembia aruba mapang tang iba tekümdangtsü ya agütsüogo.
International Olympic Committee (IOC) aser Tokyo 2020 achaayangertemi taoba mapang nung tetuyuba agütsüba angaa marathon asemtepba tenzüktsü asoshi mapang minute 30 agi takaraba kümtsüogo aser competitive walking iba dang nungi takaraba tenzüktsü sentong yangluogo.
Ajisüaka Japan Medical Association aser Tokyo Medical Association-i ashiba agi, iba ya teperi masü kechiyong asemtepba mapang talangba ka tatsük nung asemtsü koba kanga lendong lir aser tatsükba mapang saisapongtem anena atatsüla.
Japan Medical Association nungi ketdangser Kimiyuki Nagashima-i Rasemnü osangbenertem dang parnoki iba ya kanga shisabulua bilemer, ta ashi.
“Heatstroke ajanga asayartem dang masü saka staff aser asaya reprangertem dak tali kongshira emergency services tali akhangtsü aser iba ajanga medical institutions aser shirangertem dak kongshitsü,” ta paisa ashi.
Lokti anaprongla nungi tir-i iba ken o tongtibangsa agidaktsütsü asoshi Tokyo 2020 asayamung ayongertem den iba hopta tetenzüklen ajurtepogo
“Iba ken o ya kanga tongtibang masü nungbo onoki asayamung achaayangertem den majurutepla. Onoki iba ajanga tasüba dena ajurutsü ta tsübua bilemer,” ta Tokyo Medical Association tir Haruo Ozaki-i AFP dang ashi.
Heat stroke ajanga Japan nung küm shia nisung aika asür aser taküm temperature tali akümba ajangshiogo.
2020 asayamung ayongba telok otongdar Masa Takaya-i, doctor temi ken o tongtibang ka benokogo, ta ashi.
Japan-i 1964 küm Olympics ayongba mapang linük nung lemluwa paitoktsü asoshi Mongputeni/Oct nung iba asayamung ayonga liasü.