Social Welfare Department pur Golden Jubilee among

Kohima, Mongputeni/October 31 (TYO): Department of Social Welfare küm 50 ajungba Golden Jubilee benjungmong (1968-2018) dak sendakba nung tanü Capital Convention Centre, Kohima nung Department of Social Welfare-i “Uplift” omen nung ajemdaker sentong ka ayongzüka agiogo, ta ketdangsertem osang ka ajanga metetdaktsü.
Tetushi tejaoker Advisor, Social Welfare & Home Guards & Civil Defence, Noke Wangnao-i, tesüiba küm 50 nung Department kanga keraa ulushiogo, aser ibaji ajanga state nüburtem ano tajungtiba nung tenzüktsü atema khuret taliba benloktsür, ta ashi.
Paisa ketdangsertem dang nüburtem nüngdak balala reprangtsüla, kechiyong state nüburtemi departtment dak tuluka imlar, ta ashi.
Paisa, lenla ajak nung terenlok aser department tejakleni aotsü atema tongtibangtibaji tazüokba aser meranga inyakba lir, ta ashi.
Paisa Department nung taoba mapang inyakertem aser tang teinyakdak ketdangsertem aser staff temi nendaka inyakba ajanga state nübur junga tenzükba atema parnok nem tenüngsang agutsü.
Kasa sentong nung Directorate, Social Welfare, T. Merangtsungba Aier-i, 1968 küm iba department tenzükdangbo ketdangser pezü den staff kar dang liasü, ajisüaka tanübo iba department nung ketdangser 150 den staff meyirjang aika lir, ta ashi.
Paisa, tesüiba küm 50 nung Department-i alizüng aika tongtetogo, aser item rongnung Anganwadi Centres 3980 nung ICDDS beneficiary lakh 3.36, senior citizen 57,400, amitsür 4464, mata mabensar 3276, nükpoker 1625 nem pension agutsüba, matamabensar kaketshir 208 nem scholarship agutsüba aser melungtet telok 50 dak tema nem Grant-in-Aid agutsüba densema lir, ta metetdaktsü.
Kasa sentong nung mezüngbuba Social Welfare Director, A.Y. Odyuo, Retd. Director, Khevito Shohe, Tuensang nung mezüngbuba officer, Retd. Additional Director, Akangmeren Jamir aser Secretary, Social Welfare, Sarah R. Ritse nungeria jembia liasü.
Iba sentong ya Susan Angami aser Neingulie Nakhro na leniba nung agi.
Pastor, KABA, Sentisashi Aier-i lai zünga sarasadem aser Joint Director, Social Welfare, Atoli Sema-i lokti pelaa agizükba o jembi.
Director Social Welfare, T. Merangtsungba Aier leniba nung asürtem bilemteta liasü.
Addl. Director & Convenor, Jubilee planning committee, Tulula Pongen-i tepela o jembi aser Nagaland Chamber Choir, Dreams Unlimited & Cherry Blossom School, Kohima nungeria shilem balala agia liasü.
Mission Director, NCRC, NEI, Rev. Neivotso Neikha-i tenüngsang agüja sarasadem aser sentong nungsa Advisor, Noke Wangnao-i Jubilee Souvenir sayatsü, ta kasa osang ajanga metetdaktsü.