Dimapur nung public-i ‘Sorkar Ka, Saru Ka’ bangzüng nungi masetshir

October 31, 2018 nü Kher Mahal junction, Dimapur nung Naga Council Dimapur nung Public Action Committee (PAC)-i lokti sentong tulu ka ayonga agidak adener kar noksa nung angur.

Dimapur, Mongputeni (October) 31 (TYO): October 31, 2013 nü Dimapur nung lokti sentong tulu ka nung “Sorkar Ka, Saru Ka” ta asüba bangzüng renemba sülen küm 5 lir tanü Naga Council Dimapur nung Public Action Committee (PAC)-i iba mesükba sentong ka ayonga agidang kasa telemtetba agishiogo.
Tanü sentong nung kaketshirtem dena nisung meyirjang aika aden aser parnoki kasa telemtetba agishi aser state sorkar dang ozüng alema tax saruba anentsü atema ayongzük.
Public Rally-i state sorkar dang Dimapur district aser temeket nung syndicate aser lease system tangsa anendaktsütsüla aser Naga Political Groups (NPGs) dena telok balala den state sorkar agency temi ozüngi memelaba collection centres lapokba shibangtsü atema telemtetba agi.
“Tax saruba masü saka Yimten latettsü” posema nungittsü aser iba tangatetba nungi masetshitsü ta tanü public-i bangzüngtep aser parnoki India sorkar o NPGs dang Naga yimten latettsü atema mapa inyaktsü mepishia metetdaktsü.
Naga yimten teloktem aser state sorkar agency temi ozüng alema tax saruba anema public-i kin, telok aser lokti nung longjemer noktaktsü ta tanü telemtetba agi.
Parnokisa PAC (NCD) nem telemtetbatem mapa küma inyaktsü atema tashi agütsütsü lemtet.
Tanü sentong nung adenertemisa High Power Committee-i tangsa state sorkar nem report agütsütsü atema takhangba agütsü.
Lokti nung temeten aser temelenshi bener arutsü atema inyakba maparen nung nisung/telok kari danga lennirtem amokmerena, rongshia mesüra jashidaktsütsüsa mapa kar danga inyakra, ibaji nübortem mezüngmeshiba ama züngshitsü aser iba atema nübortem longjemer telangzüba agütsütsü ta tanü rally nungsa telemtetba agi.
Union/welfare organization zünger mezüngmai saru balala saruba, NPGs-i syndicate aser lease systems inyakba aser sorkar agency temi ochimeshii tax saruba inyakyimtem indang tebilemtsü atema PAC Naga Council Dimapur-i mapa inyaktsüsa aküm. Kechiyong iba khuret ajanga public rongsenkettsüng tsütsü aser tekolok nunga timtem jenti ajurur, ta PAC NCD Convenor, Vekhosayi Nyekha-i sentong nung okila jembidang ashi.
Shishilembartem khuret mekokteter aser iba jagi kechisarena ajak nung jenjang tujen atur. Shishilebaba item ajak nung tax meshir saka sorkari ozüng alema sen aruba mapa atema mebilemtsür, ta Nyekha-isa ashi.
“Naga linük asoshi inyakertemi nüjiso atema raratsü melena tax saruba nung kanga mazünger aser parnoki parnok yarirtem meyiper amokmerener. Parnoki tim masüba yimya agi sen bendenba ajanga kiojen yanglur aser garitem alir. Iba jagi parnok tarutsü jenjang tajungba akümer ta bilemer saka atangji nungbo parnoki parnok sasa aser par senmang samatsür,” ta PAC convenor-isa metetdaktsü.
Külen, state sorkar ketdangsübaren reprangdangra, parnok-a kasa dang lir. Ozüng amertemi ozüng alema tax saruba menokdangteter. Asenoki temelenshi nüngdaker, asenoki NPGs, government agencies, unions/citizens ajanga ozüng alema tax mesaruba Nagaland tasen ka nung linür, ta paisa shisem.
India sorkari tebilemba tamajung nung mapa inyaker, kechiyong parnoki olemtep mapang atsülanga odaktsüba ajanga telok tasentem adoker aser ibaji ajanga nübortem ang timtemdaktsür, ta Nyekha-isa ashi.
Naga Council Dimapur President, Bangerloba-ia nübortem dang ozüng alema tax saru anema longjemer noktaktsü ayongzük.
State sorkari tax saruba mita reprangtsüla aser ozüng alema saruba ajak anendaktsütsüla. India sorkari Naga yimtem latettsü atema temulung magütsüba ajanga tanü ozüng alema sen onsara saruba khuret ajuru. Naga nungeri yimjung aginür aser renloknür. Anungji Naga yimten tangsa latettsüla, ta Naga Council President-isa metetdaktsü.
Senior Citizen aser PAC indang Fact Finding Committee züngsem Hekhevi Achumi-ia tax saruba indang osang tejangja metetdaktsüdang “Nagaland-i khu bener aruba truck gari kati check gate tem nung sen 26,000 tax agütsür aser gari tulutem nung tax teimba meshir” ta ashi.
Second hand süoshitem indang syndicate system ajanga küm Rs nung sen lakh 72 shi tax saruteter. Syndicate temi paan tou atema küm nung sen lakh 54, ngashi atema küm nung sen lakh 62 aser ano alo, entsü, lasüng aser supari atema syndicates tenteta lir, ta Hekhevi Achumi-isa metetdaktsü.
Shishilembadak ayokba aika atema Dimapur Chamber of Commerce & Industry mesüra Dimapur Municipal Council-i jenjang latetja mali, ta paisa shisem.
“Onoki tax menoktsü saka tamasa lessees, syndicate system etc agienang. Telungpur teloktemi tax saruba indang osang tejangja agütsütsüla” ta Hekhevi-isa takhangba agütsü.
Police-i check gates nung sen lakh 12 tax saruzüker aser iba atema Deputy Commissioner aser Commissioner of Police Dimapur dang iba mapa anendaktsütsü atema shiogo saka parnoki mapa kecha meinyaker, ta paisa shisem.
Veterinary Department-i itashia an bener aruba atema tax meshiba nung sen lakh 66 saruteter aser külen Geology & Mining Department-i lisem abenba truck shia sen 300-400 tax meshir, ta paisa metetdaktsü.
Traffic police-ia tatemtsü balala amer garitem nungi sen meshir. Dimapur nung union 86 lir aser iba nungi Union 41-i tax sarur. Union tem ya industry ama kümogo aser Naga nungeri Union ya sen aazükba factory ka ama bilemer. Kümshia ozüng alema tax saruba nung sen crore 400-500 shi bendener, ta PAC indang Fact Finding Committee züngsemisa metetdaktsü.
Tanü agiba sentong nung Naga Women Hoho Dimapur president Sungsaben Jamir, Bengali Samaj President K K Paul, Central Naga Tribal Council Advisor Pius Lotha, Angami Public Organization Advisor Savi Liegise aser Eastern Naga Public Organization Senior Leader Lemba Chang nungertemia o jembi.