Nüngdak reprangtettsüla

Mapa inyaktsüba ya nüngdak reprangtetba nungi adoker. Nisung karibo ki janaa aliyonga mangu ser akiyaa aotsü, ano karibo süng-long agi yimdong tepdanga aliyonga endoktsü melen mekena aotsü, ano karibo nisung kar timtema aliyonga yaritsü mebilemtettsü. Iba kasaji, pei alidak nübortem nüngdakba aika liaka itemji yanglutsü mesüra bener arua ayoktsü asenoki mereprangtetter. Iba timtem aser mekokmein jagi asenoki business meinyaktetter aser rongsen manung timtema sensaker kümer alir. Alima nung ya asenoki jungjunga bilemdangra, nisung kar asoshi timtem ajurubaji kar asoshibo temoatsü asür.Tatishitsü agi, nisungtem shirangtsüsa wara arubaji sen agi mozü ayoker aser shiranger yarirtem asoshibo temoatsüang akümer. Iba amaji, tanü Nagaland nung gari lenmang majungba agi gari melamelaa menenadokbaji gari shidoktsürtem asoshibo temoatsüang akümer. Iba amaji, nisungtem rongnung meputep adoka okadak ken o jembitsüsa akümbaji okatsür atemabo tajangzükang akümer. Aji oda, nisungtem timtemba aser nüngdakba reprangteta shirnoki inyaktsü tenzüker, parnok asoshi mapa inyaker meinyakma aser yamaji pei asoshia tajangzük aser nübortem nema anisüngzük agütsür. Iba amaji, tanü asen lima nung kechi nüngdaker aser nübortemi kechisa sapua achir aser agir ta bilemdanga nübortem nüngdak reprangteta item nüngdakji ataloktsütsü merangtsübaji tanü kaketshir aser lanurtem mapa asütsüla. Tang tashibo asenoki government mapai aitsü bilemba dak alaka ibaji adendanga oa nübortem nüngdak ataloktsütsü mebilemer. Tilatiba agi, tanur aika azüngba school ka kima, tanurtem asoshi anüngdang achiba chiyongtsü kar yanglua ayoktsü nüngdak reprangteta, yangji hotel tilaka lapokba agi tajangzük lia inyaktettsüa akok. Iba kasaji asenoki amtsük-amsang kanga achir süra ponglashi lu tulu yima iba jagi amtsük dena yanglua ayoktsüsa lanurtemi bilemdangtsüla. Alima nung kechisarina, oda gari aser tayimtsü dena, yanglutetbatem ya lanur kari nübortem asoshi nüngdak reprangteta bilemdangba ajanga yanglutetba temoatsütem lir. Asen lima nung bengana aser aonsutsü kanga junga züsentetter saka tayokdak maka timatemer, ajisüaka lanurtem asoshibo item timtem jagi temoatsü küma inyaktettsüsa bilemdangtsüla. Aji oda, asen lima nung züsentetba aonsutsütem agi chiyongtsü tapu balala yanglua tangaleni yoktsüsa asenoki bilemdangtsü tenzükra asenoki mapa küma inyaktettsü. Joko, tanü putu nungbo kodaser government mapa angutsü ta asüba kisüng nung merangloki, kodaser nübortem nüngdakba kabosa ataloktsütsü ta asüba nung asenoki bilemdangtsüla. Iba amaji, kodang asenoki nübortem nüngdakba indang bilemdangdir asenoki nüngdakji reprangtettsü aser nüngdak reprangtetba mapang aser anogoji asenoki asenoksasa asenoki inyaktsüba mapa angur asütsü. Mapa manguba ya mapa inyaktsü aika lir ser nung mereprangtetba agi mangur. Yangi tamalen shisemba ama, ki danga atua janaa aliyonga aoktsüla ta mereprangtetra mapa teinyaktsü makatsü. Iba amaji timtema aliba nübortem nüngdak mereprangtetra teinyaktsü makatsü. Shirnoki nübortem nüngdak reprangteta inyaktsü tenzüker, parnok asoshibo mapa inyaker meinyakma kar, saka shirnoki nübortem nüngdak mereprangtetter aser ano reprangtetyonga inyaktsü memulunger, parnok asoshibo teinyaktsü kecha maka akümer, anungji itemji mapa mangurtem akümer. Tanü asen lima nung mapa inyaker meinyakma kar saka asenok aika mapa inyaktsü maka kazüteper. Ibaji asenoki nübortem nüngdak mereprangtetba agi aser nübortem nüngdak mereprangtetbaji asenoki asen nübortem kechi nüngdaker ta mebilemdangba ajanga lir. Kodang asenoki asen nübortem nüngdakba indang bilemdangdir, idangji asen nübor nüngdakji inyaker meinyaktsüma angutsü. Item rongnungji kangasa nüngdakba aser peii jangraba aser inyaktettsüba mapa ka shimteta inyak tenzükra, takok aser tajangzükji ana nung dang angutsü.