Maradona kerak yanglu ka sayaogo

Yimpoksüi/November 1, 2018 (Agencies): Rasemnü Diego Maradona arishi küm 58 ajungba den külemi yongminyin agi yangluba pa indang kerakyanglu ka sayaogo.
Maradona asoba anogo ya Mongputeni/Oct 30 nü liasü saka tzünglu aruba ajanga pa indang kerak yanglu ya anogo ka lir sayaa liasü. Iba kerak yanglua ya Buenos Aires nung Argentinos Juniors club stadium anasa lir, kong pa 1976 küm mezüng asayaa tenzük.
Iba sülen küm 10 lir Maradona lenisüba kübok Argentina team-i 1986 World Cup akok, kong pai football asaya otsü nung ajaki bilemtetba goal idakja liasü. Iba goal dang ya “Hand of God” ta ajar.
Süklep 9 talang kerak yanglu ya Maradona, Argentinos Juniors indang uniform temerem ka semer tangokba noksa ka anasa terrace ka nung yua lir. Iba kerak yanglu lapokba sentong nung Maradona-bo maden. Pa tang Mexican second-tier club Dorados de Sinaloa coach mapa agizüker inyakdar.
“Kerak yanglu ya asürtem atema timba yanglutsür saka Diego-bo taküm lir,” ta Alberto Perez-i ashi.