Di Maria, PSG den tenangzüktepba tasen yangluogo

Yimpoksüi/November 1, 2018 (Agencies): Paris Saint-Germain winger Angel Di Maria, küm ana atema tenangzüktepba tasen ka yangluogo aser French champions nungi 2021 Aami/June tashi asayatsü.
Arishi küm 30 tain asayar ya Manchester United nungi 2015 küm PSG nung arua aden. Pa PSG puri euro million 60 agi alizük aser iba mapang nung PSG puri Uruguayan striker Edinson Cavani aliba sülenbo pa aliba nung sen timba indok.
“Ni küm asem jangradema asayaogo, kong ni nüngdakba ajak peria lir anungji ni kü sempet tajungtiba amshia asayatsü dang nüngdaker,” ta Di Maria-i ashi.
“Anogoshia ni kanga tushia bilemer aser takok asoshi inyaba telok ka den shilem ka asütsü tali ajungshir. Ozü teammate tem den külemi ajangtettsü aika anunga lir aser onoki maneni PSG renloka aoba nung teyari agüja club tulu ka kümdaktsütsü,” ta paisa ashi.
Rosario Central nungi asayaa tenzükba sülen pa Europe-i arua Benfica den 2007 küm aden aser iba sülen küm asem lir Real Madrid nung aden. Maneni pa 2014 küm Manchester United nung oa aden aser iba sülen PSG-i ao. Pai PSG nungi asaya 150 nung shilem agiogo aser iba mapang nung goal 57 agütsüba den assist 58 süa liasü.
Pai PSG den külemi Ligue 1 title 2016 aser 2018 nung kokogo aser iba den külemi French Cup aser French League Cup, 2016, 2017 aser 2018 nung koktetogo.