Jang Hyun-soo Korea National Team nungi kodanga masayatsü

Yimpoksüi/November 1, 2018 (Agencies): South Korea defender Jang Hyun-soo taküm tepeyong national team nungi masayatsü asoshi tenokdangba agütsüogo aser iba den senchi won million 30 chiogo. Pai military service dak sendakba nung osang tai agütsüba atema merenshi.
South Korea nunger anema aliba teburtem ajaki military service küm ana agütsütsü nüngdaker, saka asayartemi Olympic nung medal ngura mesera Asian Games nung gold medal ngura parnok iba mapa inyaktsü nungi tai adoker.
Küm ana military mapa minyakba melena asayartem basic military training hopta pezü agitsüla aser küm asem tsüngda community service ghonda 500 agütsütsüla.
Jang shibai linük asoshi 58 ben asayaogo aser 2014 Asian Games nung gold medal anguba team nung dena liasü, pai community service inyakba dak sendakba nung osang teyazü agütsü.
Arishi küm 27 asayar koda merenshitsü, aji lemtettsü asoshi Korea Football Association Yangtepnü ajurutepa liasü. Pa taküm World Cup nunga Korea nunger asaya asemprongla nung shilem agiogo.
“Jang teti asoshi national team nungi aginogo aser senchi won million 30 chiogo,” ta KFA otongdar-i ashi.
Iba den bendenloksema Sports Ministry-ia anogo pongu mapa inyaktsü asoshi Jang nem tetuyuba agütsüogo.
KFA disciplinary committee mendenbuba Suh Chang-hee-i ashiba agi, Jang linük tenüng nungi asayatsü tapet masü ta parnoki lemtet.
Kasa mapang nung Jang-i Yangtepnü pa mapa asoshi tatok meshiogo.
“Ni KFA temerenshi aser nüburtemi aitsüba agizüker. Ni aibelen tulu ka menaogo,” ta pai KFA website ajanga metetdaktsü.