Ranji Trophy Dimapur nung tanü tenzükogo

Nagaland Ranji team aser ketdangsertem tanü NCA Stadium, Sovima nung tangokba yangi noksa nung angur.

Dimapur, Yimpoksüi/November 1 (TYO): Nagaland-i ayongba Ranji Tropy asaya tanü Sovima Cricket Stadium, Dimapur nung tenzükogo.
Asaya metenzük tsüngda Nagaland Chief Minister Neiphiu Rio-i Nagaland Cricket Stadium Sovima, Dimapur nung Player’s Pavilions tasen lapokja liasü.
State asoshi otsü tasen ka yanglua Nagaland cricket team tanü mezüngbuba Ranji Trophy Mizoram den asayaogo. Asaya nung chief minister coin flip süja liasü, koba Mizoram team-i akok aser parnoki mezüng bat asütsü shimtet.
Nagaland cricket stadium Sovima, nung osangbenertem den sensaksemba mapang General Secretary, Nagaland Cricket Association, Abu Metha-i ashiba agi, iba asaya nungi tenzüka Nagaland nung cricketer tem maongka nguyonga aotsü. “Ranji Trophy asayar Naga nunger cricketer tem ajak asaya shia sen lakh 1.5 shi angutsü aser iba nung allowances tem; travelling expenses, kits amala densema mali aser season tatemi Ranji Trophy asayartem ajak sen lakh 20 nungi 25 tashi aatsü,” ta Abu-i ashi.
Paisa iba ajanga employment aser rongsenketsüng nung teyari agütsütsü ta ashi. Maneni Abu-i ashiba agi, Nagaland-i BCCI asaya ayongba shia sen crore 4 nungi 5 tashi Naga nunger rongsenketsüngi aittsü aser taruba küm nungi tenzüka Nagaland-i asaya aika host asütsü, ta ashi.
Mezüngbuba anogo asaya osang:
Mizoram (1st innings) 106 all out in 47.2 overs.
Nagaland (1st innings) 189 for 4 on day 1.
Tanabuba anogo asaya 8:45 ako nungi tenzüktsü
Sovima cricket stadium, Test match tem nung ketdangsertemji, Match referee Shakti Singh, B K Ravi Unpire, Abhijit Deshmuk Umpire, Utpal Das Video analyst, Raju Kumar Pandey Scorer asütsü.
Deputy Chief Minister, Nagaland, Y.Patton, aser MLA tem den, BCCI officials, tongtibang nisungtem aser cricket asaya meimer aikati mezüngbuba anogo asaya arua reprangogo.