Tesayurtemi pei mapa akhümket angateta inyaktsüla: Minister Tongpang

Kohima, Yimpoksüi/November 01 (TYO): Nagaland PWD (R&B) Minister, Tongpang Ozukum-i, shisaliok inyakyim nung tongtibangtibaji tesayurtem lir; tesayuba mapa ya mapa ka dang masü saka mongin mapa ka lir, aser ibaji khuret bena inyakba ajanga ajangzüktsü, ta ashi.
Tanü John GHSS Viswema nung anogo ananü All Nagaland School Teachers Association (ANSTA) 40buba lokti senden nung jembidang Minister-i, “Tesayur mapa ya akhümket mapa ka lir, aser na iba mapa nungji lira na tangar dang nungi khuret tuluba lir,” ta ashi.
Tesasaba olen ka nung pai, zünger alir lanur mesüra tesayur mapa ngur alir aikati sorkar sector nung mapa angutsü tesabuba maongkaji tesayur mapa lir ama bilemer, ta ashi.
“Ibaji lendong aketba tangatetba ka lir. Nai jangraba agi masü saka tanga lenmang maliba agi na tesayur akum süra kaketshir meyirjang aika tarutsü tia raksatsüba aser loktiliba aoksadaktsübaji na ajanga asutsü,” ta ashi.
Tesayur temelen inyakdaktsüba anema School Education Department-i mapatong aika benoka inyaker, ajisüaka tesayurtemi department tetuyuba mebenshira iba ya takok ngua mebenoktettsü, aser ibaji ajanga kaketshirtem timtemtsü, ta pai ashi.
Minister-i ashiba agi, communitization inyakyim ajanga Village Education Councils (VECs) aser Ward Education Councils (WECs) nem tashi tulu agutsüba ajanga department-i tesayurtem azüoktsü tashi ajemogo.
“Parnokji (tesayurtem) sorkar tenzükertem masü saka VEC mesüra WEC tenzükertem ama kümogo,” ta pai ashi.
Iba dak sendakba nung Minister-i mapang shia department-i iba inyakyim ajanga tajangzük aser takoksa anguba asadangtsüla, koba ajanga sorkari item school nung tatalokbatem metettsü, ta ashi.
Mapa ajak rongnung tetsütiji tesayur mapa ya lir ta züngshir, anungji loktiliba junga yangertsü atema iba mapa süoki ia agia inyaktsüla, ta ashi.
Tesayurtemi pei mapa akhümtsübutsüla, ta shia Minister-i, “Nendaka inyakba tesayur kaji school atema senti lir, anungji ner school aser department den külemi külem tenzükertem dang tatishitsü tajung sayuang,” ta ayongzük.
Tongpang Ozukum-isa, iba senden ya lokti senden ka dangbo mesüdaktsütsüla saka pei sasa pei asadangba mapang ka südaktsütsüla, ta ashi.