Amit Shah-i Mohan Bhagwat ajurua Ram tekülem ki atema jembi

New Delhi, November 02 (Agencies): Tanü Mumbai yimti nung RSS executive senden alidang Bharatiya Janata Party Tir, Amit Shah-i RSS tongti, Mohan Bhagwat ajurua jurila senden ka amen, ta osang ka ajanga metetdaktsü.
Kasa osang ajanga ashiba agi, lenir anati Ayodhya nung Ram tekülem ki yanglutsü onük nung o lemtepa liasü. Shah-isa RSS lenirtem aika ajuruogo.
Anogo asemnü RSS indang Akhil Bharatiya Karyakari Mandal senden ya taonung tembangtsü.
Taoba ita Supreme Court-i, tapet bench kati sangküm January ita nung Ram Janmabhoomi-Babri Masjid li mangatettep ken o angadangtsü, ta metetdakja liasü.
RSS-i Ayodhya nung Ram tekülem ki yanglutsü atema sorkar dang Parliament nung ozüng ka benoktsü atema takhangba agüja arudar.
Tan hopta tetenzüklen RSS otongdar, Arun Kumar-i, “Ibaji temelungjang nung yur Supreme Court-i tekaraba nung telemtetba agitsüla, aser timtem kar danga lira, Ram Janmabhoomi tesem nung tekülem ki yanglutsü atema tetsükdaktsü ajak agientsü asoshi sorkari ozüng ka benoktsüla,” ta ashi.
Ayodhya nung Ram tekülem ki tekaraba nung yanglutsü atema takhangba agüja RSS-i, Gujarat nung Sardar Vallabhbhai Patel-i Somnath tekülem ki yanglushiba ama tekülem ki yanglutsü atema sorkari ozüng ka benoktsüla, ta ashi.
NDA nung BJP den teloktep, Shiv Sena-ia kasa takhangba agütsüogo.
Party tongti lenir, Uddhav Thackeray-i November 25 nü Ayodhya semdanga Ato kilonser, Narendra Modi dang Ram Mandir yanglutsü atema nenshia metetdaktsütsü.