Assam nung civilian 5 khasetba atema bushisüngdanger; Bengali teloktemi mokdang ayonga lungkak aiter

Guwahati, November (Yimpoksüi) 2 (Agencies): November 1 aonung Assam nung civilian 5 khaset sülen Army-i Assam-Arunachal Pradesh arrtsü anasa telungpurtemi mita aoba mapa tulu ka tenzükogo.
Maneni, Assam Rifles-i Indo-Myanmar arrtsü nüka mitdar.
Panbazar police-i United Liberation Front of Assam-Peace Talks lennir Mrinal Hazarika jaokogo. Tawa tu pai Citizenship (Amendment) Bill, 2016 posemba Bengali teloktem amokmeren.
Yasüng khasetertemji Shyamlal Biswas, Ananta Biswas, Abhinash Biswas, Subal Biswas aser Dhananjay Namsudra nungertem ta jangjaogo aser parnok ajak ya Bengali nunger liasü, ta police-i ashi.
Tanü Tinsukia district nung Bengali nunger telok aikati ghonda 12 mokdang aser Bengal Chief Minister Mamata Banerjee-ia ashiba agi lar state nung Trinamool Congress-i tesem balala nung lungkak aittsü.
Union Home Minister Rajnath Singh-i Twitter nung iba tatalokba aitsüogo. “Upper Assam nung civilian tepsetba atema temulung raksar. Iba ya ozüng alema inyakba tamajung ka lir. Assam Chief Minister Sarbananda Sonowal den jembiogo aser aibelenertem dak ozüng tesashi agi merenshitsü shiogo” ta Rajnath-i ashi.
Iba lendong atalokli Assam Chief Minister Sarbananda Sonowal-i State Minister tem- Keshav Mahanta aser Topon Kumar Gogoi na dang tesem tonga aotsü aser osang agiteptsü atema tetuyuba agütsü.
CM-isa Assam Director General of Police Kula Saikia aser Additional Director General of Police Mukesh Agarwalla na tesem tongo aotsü tuyuogo, ta sorkar sangdong ka nung ashi.
Tanü police-i olemtep nung adenba ULFA lennir ana- Mrinal Hazarika o Jiten Dutta na pua lir.
Civilian pungu khasetba lendong nung shilem agi ta temulung melemi bilemba agi Panbazar police-i Hazarika apu.
NDA-i Citizenship (Amendment) Bill, 2016 benoktsü merangba anema taoba anogo ishika Hazarika-i anema jembia aru.
Hokolbarnep police-isa Jiten Dutta apu. Tanep 11:00 ako meta Sivasagar district kübok Gaurisagar nung pa apu.
Lachit Sena züngsemtemi Dutta apuba anema national highway mokdangtsü amokmeren aser iba jagi additional superintendent of police ka lenisüba kübok pa Guwahati-i anir ogo.
Hazarika ama Dutta-ia Bharatiya Janata Party (BJP)-i Citizenship Amendment Bill yanglutsü merangba anema jembia arur.
Tanep International Bajrang Dal aser Hindu Kranti Dal züngsemtemi Dibrugarh nung Dhola tatalokba aitsü lungkak aitba sentong agi.
Tai maketba nisungtem tepsetba atema parnoki ULFA (I) dak tai tongloktsü.
Bengali Yuba-i ghonda 12 mokdangtsü ayongba ajanga Dibrugarh aser Tinsukia nung timtem ajurur.
“Tai maket nisungtem tepsetba onoki aitsür aser ULFA (I) dang Hindu nunger metepsettsü sangoktsür. Parnok (civilian) Hindu Bengali nunger liasü aser küm aika iba tesem nung liyonga aruya liasü. Parnok (telungpurtem) ya lapi dang aser tai maketba nisungtem dang tepseter. Parnoki Bangladeshi Muslim nunger tepsettsü tasü maiter” ta züngsem kati ashi.
Ajisüaka, ULFA (I)-i iba mapa nung shilem magi ta ashir.
Külen, All Assam Bengali Youth Students’ Federation-ia iba tatalokba aitsüogo.
“Tasür kibong shia nem sen lakh 20 agüjang ta onoki akhanger. Sorkari nübortem kümzüka meyuteter” ta AABSF secretary Nirmal Kanti Seal-i ashi.
All Assam Bengali Youth Students’ Federation-isa Honibarnü ghonda 24 mokdangtsü ayongzükogo.