Dimapur nung ANCSU Collegiate Meet alitsü

Kohima, Yimpoksüi (November) 2 (TYO): All Nagaland College Students’ Union (ANCSU)-i November 13 nungi 17 tashi College Meet amungtsü sentong renemdar.
Iba sentong atema host ji Dimapur Government College lir aser “Invigorating young Talents” omen nung ajemdaker amungtsü.
Anogo pungunü sentong nung ANCSU kübok züngsema aliba college 41 nungi teshimtet nübo 1500 shi adentsü, ta tanü osangbener senden ka nung ANCSU vice president Benjong Longchar-i ashi.
Teburtem atema akhi ama football, tetsürtem atema volleyball aser College Beat Contest dak alia taküm tetoktepba ana bendenloker aser ibaji Badminton Mixed Doubles o Miss ANCSU lir, ta paisa metetdaktsü.
Item tetoktepba atema college ajaki telatetbatem jungjunga metettsüla mesüra osang jangjashitsü atema ANCSU ketdangpurtem den osang agiteptsüla. Collections aser entry forms agütsütsü atema tatembang anogoji November 5 asütsü, ta paisa shisem.
Miss ANCSU contest ajanga Naga nunger indang sobaliba takar aser inyaksangshitem ajungkettsü imlar, kechiyong iba tetoktepba nung sobaliba sübotsü indang round den Modern Ethnic aser Final round agitsü, ta ANCSU general secretary Vimeyiekho Vitso-ia ashi.
Tetoktepba nung adenba college temi Beat Contest aser Miss ANCSU Beauty Pageant final atongtsü atema screening alitsü, ta paisa ashi.
November 13 nü Additional DCP (Crime) Relo T Aye-i introductory session nung adentsü, November 14 nü inaugural function nung PWD Minister Tongpang Ozukum, Beat Contest nung Rural Development Advisor Dr. Nicky Kire aser November 16 nü valedictory function nung Advisor Zale Neikha nungertem adentsü.
State sorkari school kaketshirtem anitettsü atema tetoktepba balala ayonga agir anungji college jenjang nunga sorkari item mesükba tetoktepbatem agia lanur dak aliba sempettem ajungkettsüla, ta Benjong-i mepishia metetdaktsü.