Pei talidak shibai tobur junga yutet

~ Talitemjen Imchen.

Mokokchung ya Nagaland nung samanir yimti ta tenüng jaloktsür külen, taküm agi küm pongu ajonger südi! Liyonga arudang, tanübo ajak asoshi Mokokchung ya Nagaland tenüdangtsü (The Mirror of Nagaland) ka kümogo. Naga kintem-i dang masü, alima-i tenük yoker arudar. Iba ama putu ka nung, pei lima koma tobur junga ayutsü aser nüburtem koda anisüngzüka alitsü kanga tongtipang. Pei lima tobur junga ayutsü atema aser anisüngzüka alitsü atema, asenok ajak pei pei sasep takar alitsüsa litettsüla. Nübutsük rongsen kümzüka alitsü nüngdaker.
Tanü putu nung mapa meranga inyak nung dang, taküm ka ji anisüngzüka litet. Meranga inyaktsü atema temang anema alitsüla. Temang anema alitsü atema, anasa temang anepalutsü mozüki tajung nüngdaker. Asenok-i mozüki tsütsü shisadangra, tangarbo kima mozü ki nung aneper. Saka Mokokchung nung alir shirangerbo ajak Dimapur, Kohima aser Nagaland ajanga or alir mozükitem nung anepalur aser aneper arur. Mesüra idakji süa bener arur. Mokokchung nung mozüki tajung maliba ajanga, temang anepalutsü nübutsük aser rongsen shilem ka indoktsü aliba to agi, shilem asemsü talila indoktsüsa akümer. Yamaji tebilemtsü khureta shilem asemsü talila akümer.
Kodang Mokokchung nung alir ka asoshi tanga mozüki bushia bener aotsü ta südir, tebilemtsü tuluka akümer. Kechiaser bendang lima nung amongtsü, senotsü talia nüngdaker, nübutsük talila nüngdaker. Iba den alia lenmang angur ka nüngdaker. Item ajak nungi kümzüktsü asoshi, anasatiba ji Imkongliba Memorial Hospital Mokokchung nung Intensive Care Unit (ICU) alitsüla. ICU kodang lidir, idakji operation kol (machine) alitsüla, Doctor specialisttem alitsüla. Süra samanir (Naga lima tebu) tenüng nung item alitsü ji Mokokchung nung malang asü? Sorkar lenir aser lokti lenir kari sorkar den tekaratiba nung tongtepratepa inyaktet nungbo, Mokokchung netsüngtem asoshi rongsen aser nübutsük timtiba kümzüktetba ji aji asütsü. Aser timtem khuret mapang, pei lima nung yariteptsü koda tajung.
Tanabuba nung arju asüba yimya ya, Lotha aser Ao kin tera mesüktepa akaba dak alaka, Naga kin ajak arju asüba yimya balala. Dimapur amala nung Ao kin indang Arju yanglur angudang kanga temolung sangwar. Talisa kin tabensa alidak, Diphupar süngkhüm (gate)i anir süngkhüm kwika nung Aor arju yanglur lir, Aor chanu ka ama tenük sünga repranger. Shir asameyang tajung ajanga itemji yangluar, tenüng metetshiaka, kanga pelaba shisemer. Yamaji alima yimkong senzüdak, Mokokchung lushi (Jurisdiction) nunga, tsütapela süngkhüm (gate) ama, Tuli aser Amguri yongtsü nung süngkhüm ama aser Longsa yim o Sangtam arrtsü, item amala nung süngkhüm ji Aor arju kaka yanglutet nungbo, asen lima akümket aser meraket ji itemji asütsü.
Tasembuba nung joko Christmas arur. Temalenbo Christmas tree ya kilong nungsa yanglua liasü. Küm ter shika arudar. Christmas tree temai adoker, pei ki, kima aser atsü temeket ajak yinzü agi mesangpanga sangwadaktsür. Christmas mapang kobala tajungbar ta penzüa senzüdang, nisungtem kanga belemteper. Saka joko taküm küm nungi asü? Yaküm nungiar, Dimapur lima nung kibong shia kima jana rezüngdak (dust bin) temenünütsüka ao agi yanglua kar. Ashiko takümbo kodakerinaka Christmas tesangwatem ji inokyonga, tobur junga madoktsü südi. Naia ner medemsanger kima ji reprangang. Tenüng nung jaloka jana rezüngdak jupang nung jana ayubatem ji, kanga temenünütsüka yanglur yua kar ji. Asenok ajak asoshi jana indokdaki oa, indoktsü kangarabo tasak mali. Aser ibaji ajanga, Dimapur lima alir asoshi tetsüng agi senzütsü maongka (chance) angur. Pei indang janatem bener oa, jana indokdak indoktetba ji maongka tulu ta ajaki menürema bilemtsüla.
Arung asenok tenüng agi dang samanir masü, saka Aor ajak samanir chanu kaka küma, asenokibo kima jana rezüngdak sapang ya meyangluli. Tangar dang tatishitsü tajung sayua, akhi ama jana indokdaksa bener oa indokdi. Iba jagi tanaben Dimapur tobur tajung samar aliba meyipa bener arudi ta ayonger.