Angh-i Lotha nunger den Tokhu Emong salem lemsatep

Dimapur, Yimpoksüi/November 6 (TYO): Nagaland Angh PB Acharya-i Lotha nungertem den Tokhu Emong benjongmung salem lemsatepogo. Iba benjong ya alu rozüker pelatepa amungba den külemi akangjungshitepba aser tatok agüja ka küma longjemba benjongmung ka lir.
Angh-i, parnok dang tulusang Tsüngremi metitemei meimba aser moatsüba atema tenüng asangtsü asoshi mamadoktsü ajungshi.
Maneni Anghisa parnok dang aluyimertem tenüng asangtsü mamadoktsü ashi. Acharya-i, aluyimertemi tsünüsenpongtsü tali adokdaktsüba nung teyari agütsütsü asoshi Central aser State sorkar-i parnok atema soil testing, Kisan credit card, National Food Security Mission nunger amala welfare projects balala agütsüba metetdaktsü.
“Item amala welfare project tem parnok nem metetdaktsütsüji asen khuret asütsüla aser parnok ajangzüktsü atema item project balala bushia agitsü ajungshitsüla,” ta Anghisa shisem.
“Tokhu Emong benjong amungba ajanga, Lotha nunger aser Naga nunger tem nem telongjem aser yimchi-yimjung bener arutsüba benjong ka südakjang,” ta Anghi ashi.