Ayodhya nung Ram kürakyanglu yanglutsü: Yogi

Lucknow (Uttar Pradesh), Yimpoksüi/November 07 (Agencies): Faizabad district nüngja Ayodhya melentsüba sülen anogo ka lir tanü Uttar Pradesh Chief Minister, Yogi Adityanath-i, Ayodhya nung Ram kürakyanglu ka yanglutsü, ta metetdaktsü.
UP Chief Minister-i, “Nüngdakba ali apir Ram indang kürakyanglu ka yanglutsü atema o lemteptsü. Kürakyangluji tekülem kidang amenoktsü, ajisüaka ibaji Ayodhya maitsü asütsü. Iba kürakyangluji Ayodhya akhümket südaktsütsü atema onoki inyaktsü,” ta metetdaktsü.
Tanü Lucknow nung osangbenertem den jembidang Adityanath-i, Congress party aser party Tir, Rahul Gandhi-i Ram Mandir onük nung parnok tangatetba tejangja metetdaktsütsüla, ta ashi.
“Rajiv Gandhi tangatetbaji (Ram Mandir onük nung) mejangja,” ta paisa shisem.
Adityanath-i, kürakyanglu yanglutsü atema kimongji jangjaogo, ta ashi.
Yashi Deeptosav benjungmong nung Adityanath-i, tang nungi Faizabad district nüngjaji Ayodhya asütsü, ta sangdonga liasü.
“Ayodhya ya asen akhümket temaitsü lir, aser ibaji shingaia raksatsütsü makok,” ta pai ashi.
Paisa, Ayodhya nung Ram tenüng nung airport tasen ka yanglutsü aser Ram tebu, King Dashrath tenüng nung medical college ka amenoktsü, ta metetdaktsü.