Election atongdang BJP-i Ram tekülem ki bilemteter: Congress

New Delhi, Yimpoksüi/November 07 (Agencies): Congress Party-i, election atongdang BJP-i Ram tekülem ki bilemteter; parnoki Ram tsüngrem tenüng amer vote bushir, ta aitsü.
New Delhi nung osangbenertem senden ka nung jembidang Congress Party otongdar, Manish Tewari-i, “Yimtenren nung maongka angutsü atema Bharatiya Janata Party (BJP)-i Ram tekülem ki bilemteter aser parnoki maneni ibaji inyaker,” ta ashi.
Ayodhya nung Ram tekülem ki yanglutsü onük nung BJP lenir aikati jembiba o nung ajemdaker osangbenertemi asüngdangba ka langzüdang Manish Tewari-i, “Tasüngdangba kaji ya- kodang election tongdir BJP-i Ram tekülem ki bilemeter. Onoki iba ya maneni jembia arur, aser tesüiba küm 26 tsüngda item kuliji asenoki jangjar. Ram tekülem ki mesüra Ram tsüngrem den parnok tesendaktep mali, ajisüaka item tenüng amer vote parnoki bushir,” ta ashi.
“Yimtenren nung maongka angutsü atema BJP-i Ram tekülem ki tetshir aser parnoki yamaji maneni inyaker. Onoki ibaji aitsür,” ta Congress otongdarisa metetdaktsü.
BJP aser par teloktemi Ram tekülem ki aser Ram tsüngrem tenüng mamshitsü Congress-i imlar, ta paisa ashi.
Taoba ita Supreme Court-i, tapet bench kati sangküm January ita nung Ram Janmabhoomi-Babri Masjid ali mangatettep ken o angadangtsü, ta metetdakja liasü.
RSS-i Ayodhya nung Ram tekülem ki yanglutsü atema Parliament nung ozüng ka benoktsü atema Centre sorkar nem takhangba agüja arudar.
Tan hopta tetenzüklen RSS lenir kati, Supreme Court-i tekaraba nung telemtetba agitsüla, aser timtem kar danga lira, Ram Janmabhoomi tesem nung tekülem ki yanglutsü atema tetsükdaktsü ajak agientsü asoshi sorkari ozüng ka benoktsüla, ta shiogo.