Taoba GNLA tekolakbai telok tasen tentet

Shillong, Yimpoksüi/November 7 (Agencies): Taoba police ketdangser aliba nungi tulungpur akümsang Champion R Sangma, lenisüba kübok Meghalaya nung A’chik Holistic Awakening Movement (AHAM) ta nüngja agütsür telok tasen ka tentetogo.
Champion ya iba lokti tentet mendenbuba lir aser Kingstone Marak joint secretary asütsü.
Media nem osang agütsüba nung AHAM ya Chiteni/July 23, 2018 nü tentet ta sangdongogo.
“AHAM ya India kübok nüburtemi tentet aser nüburtem atema tentet. Iba ya non-political aser non-profit organization ka lir saka yimden yimsüsüba tsütsü aser lokti aser rongsenketsüng tsütsü oshi mashi anema bendanga agüja nokdaktsü. AHAM nung züngsemtem ya wadang balala ajak nungi lir aser Meghalaya o India kübok onok longjemer democratic inyakyim kübok ken o balala bentettsü merangtsü,” ta sangdong ajanga metetdaktsü.
“Nüburtemi kü nem iba lokti ya anidaktsünü aser tir inyaktsü maongka agütsü. Iba ya khuret tuluka lir aser iba khuret ya ni ozü nüburtem atema agizüker. Supreme Court-i kü nem nüjiso agütsüogo aser ni kü mapang aser taküm nüburtem atema bendanga agütsütsü,” ta Champion-i ashiba kasa sangdong ajanga metetdaktsü.
Champion-i, pa Deputy Superintendent of Police aliba mapang Meghalaya Police toktsü aser Garo National Liberation Army (GNLA) nung 2009 küm aden.
Champion ya GNLA mendenbuba liasü aser Sohan D Shira ‘commander-in-chief’ liasü shiba taküm Tsükali/February 24 security force-i tepsetogo.
Champion, Umkrem-Pyrdiwah tesem nungi 2012 küm Chiteni/July 30 nü apu aser taküm Metsüremi/March 24 nü Supreme Court tetuyuba nung chiok.