Karnataka by election ajanga Modi anemba kuli angur: Naidu

New Delhi, Yimpoksüi/November 07 (Agencies): Karnataka by election menden pongu atema agiba nungi BJP-i menden pezü tashi nung tamakok anguba ajanga nüburtemi BJP-i aniba NDA yimsüsüba agi melung masüba kuli sayur, ta TDP lenir aser Andhra Pradesh chief minister, N Chandrababu Naidu-i metetdaktsü.
Narendra Modi-i aniba sorkar anema lokteptsü tebilemba nung Naidu-i Karnataka Chief Minister, HD Kumaraswamy den tanga lenirtem ajurutsü lia pai iba o ya jembiogo.
TDP party coordination committee senden nung jembidang Naidu-i, “Karnataka nung by elections osang ajanga nüburtemi BJP sendokba aser Centre nung NDA yimsüsüba anemba kuli angur. Election osang ya ajanga Karnataka nung assembly election agitsü ita trok lia nüburtemi teloktep sorkar dang nungi kanga keraa pilaba kuli angur,” ta ashi.
Osang angazükba agi, November 9, 2018 nü Bengaluru nung Naidu-i Kumaraswamy aser tebu, HD Deve Gowda (taoba Ato kilonser aser JD(S) tongti) ajurutsü. Iba anogo nikongdang Naidu Chennai-i aotsü aser DMK tongti den Tamil Nadu opposition lenir, M K Stalin ajurutsü.
JDS-Congress teloktepi Karnataka by election nung constituency pongu nung takok anguba ajanga NDA anema teloktep tashi aittsü, ta TDP otongdar, D Manikya Varaprasad-i ashi.
Congress-Janata Dal (Secular) teloktepi Karnataka Lok Sabha menden asem nungi menden ana nung takok anguba den külemi state assembly menden anaprong nung vote aikati takok angu.
Osang angazükba agi, Naidu-i West Bengal aser Kerala na semdanga chief minister ana- Mamata Benerjee aser Pinarayi Vijayan na ajurua BJP anemba teloktep nung adentsü atema mepishitsü.