Kohima nung Global Leadership Summit akatsü

Kohima, Yimpoksüi/November 07 (TYO): ‘Everyone has influence’ omen nung ajemdaker Yimpoksüi/November 9-10 anogotem nung Union Baptist Church (UBC), Kohima nung 5buba Global Leadership Summit (GLS) Kohima ayongzüka akatsü, ta ketdangserem osang ka ajanga metetdaktsü.
GLS ya US nung agiba leadership training ka lir aser iba training ya video cast ajanga tanga linüktem nunga agir.
India nung kümshia yimti 40 nung summit 70 shi agir, aser item senden nung lenir 22,000 shi adener. Kasa summit ya India nung oshi tenet nung agir.
Tanü UBC, Kohima nung osangbenertem den jembidang Organizing Committee Convenor, Rev. Dr. Rachülie Vihienuo-i, taküm iba senden nung nisung 200-i shilem agia adentsü imlar, ta ashi.
Paisa, GLS ya 1992 küm US nung tenzük, aser tangbo iba summit ya alima tesem ajaklen mapatong ka kümogo, koba ajanga mapa inyakba tesem nung aika ajungmesoa lokti ajungketer, ta ashi.
Taküm Kohima nung ayongzükba GLS nung lenla balala nung alima nung lenirtem 9-i video cast ajanga shilem agittsü aser parnok rongnung- Craig Groeschel (Co-founder & Senior Pastor, Life Church), Danielle Strickland (Pastor aser Justice Advocate zülusang), Danny Meyer (Restaurateur, Time Magazine’s 100 Most influential people), Juliet Funt (Recognised Consultant, Speaker aser Whitespace at work tentetsang), T.D Jakes (Founder & Senior Pastor, The Potter’s House), Carla Harris (Vice Chairman, Managing Director aser Morgan Stanly nung Senior Client Advisor), Rasmus Ankersen, (Best Selling author, Entrepreneur), Erwin Mcmus (Author, Futurist, Mosaic Los Angeles tentetsang) aser Simon Sinek (New York Times Bestselling Author, Optimist) nunger lir.
Tesüiba küm pezü tashi iba summit nung adensang aser Organizing Committee züngsem, Meripeni Zares-i item summit nung pai ajangshibatem lemsatepa liasü. “Iba summit nung adenba ajanga mangdang balaka ayutsü atema na ajungshitsü aser nai lenmang aika angutsü,” ta lai ashi.
Iba summit nung adentsü atema registration ji sen 800 asütsü aser team registration (nisung 6) atema menden kabo angati asütsü, ta tayongertemi metetdaktsü.
Iba summit nung kenü dang adentsüa akok, aser kenü atema dang sen agutsütsü.
Registration form ji anepdang 10:00 ako nungi nikongdang 5:00 ako tsüngda UBC, Kohima aser Ozone Café nung angutsü; iba dak alia www.glsindialive.com ajanga online registration-a agitettsü, ta parnokisa metetdaktsüogo.