Election Commission ajurutsü atema Mizoram CEO Delhi-i ogo

Aizawl (Mizoram), Yimpoksüi/November 07 (Agencies): Mizoram Chief Electoral Officer (CEO), S B Shashank-i Election Commission ajurutsü atema Delhi-i aoba sülen tanü NGO Coordination Committee-i CEO agientsü atema takhangba agüja longkak aitba thinenogo.
CEO-i Aizawl yimti nungi Delhi-i apusoa aoba sülen tanü nikongdang 1:00 ako meta longkak aitba thinenogo, ta NGO Coordination Committee chairman, Vanlalruata-i metetdaktsü.
Tanep Election Commission-i Shashank jaoka liasü, aser asüng pai Delhi nung Election Commission ajurutsü.
CEO agientsü atema Mongolbarnü longkak ait tenzük aser tanep ako 8:00 ako nungi CEO office kima Young Mizo Association züngsem aika adenshia longkak aita liasü.
Mizoram nung November 28 nü Assembly election agitsü lia state nüburtemi Shashank CEO menden nungi agientsü akhanger.
Vanlalruata-i, “Coordination committee-i Election Commission of India-i telemtetba agiba atatsü aser pa tanaben meyipa arura maneni asentenshir longkak ait tenzüktsü, ta metetdaktsü.
Mizoram nung lokti tentet balala aser kaketshir tentettem tongti telok NGO Coordination Committee-i CEO menden nungi Shashank agientsüla, ta akhanger.
Parnokisa Tripura relief camp 6 nung aliba BRU voters ji Mizoram nung peipei polling stations nung ang vote agutsütsü melatsüla, ta akhanger.
Election Commission (EC)-i state principal secretary (Home), Lalnunmawia Chuaungo agienba sülen mapang tatsüka tsüngda state nüburtemi Shashank agientsü akhanger.
Osang angazükba agi, Shashank-i state nem central armed police forces (CAPF) tali lemzüktsütsü akhangba ajanga state nüburtem mepelar.
Hombarnü Chief Minister, Lal Thanhawla-i shidi ka ajanga Ato kilonser, Narendra Modi dang, “Joko nüburtemi pa (Shashank) dak tamang makar, anungji Assembly elections 2018 junga agitettsü atema tekaraba nung CEO, S B Shashank office nungi agientsüla,” ta mepishiogo.
1997 küm kin tsüngda raraba sülen Bru nunger meyirjang aikati Mizoram toktsür jena aoba mapang nungi parnok Tripura nung aliba relief camp trok nung jenoka lidar.
Taoba mapangtem nunga lokti tentet balalai Election Commission-i Tripura relief camps nung Bru voter tem electoral revision agitsü atema telemtetba agiba anema nokdaka liasü.
Parnoki Election Commission dang Mizoram-i meyipa marui Tripura nung maneni linertem nem vote temeden tagütsü, ta mepishiogo.
Mizoram CEO anema longkak aitba nungita Mongolbarnü Mizoram-Tripura-Bangladesh arrtsülen Mamit jila nung ghonda 12 mokdanga liasü.
Iba dak alia state tesem balala nung NGO Co-ordination Committee-i lokti senden aika ayongzüka agiogo.