Plastic melen kechi ?

Tanü lima nung asenok anogo shia amshiba nüngdak osettem rongnung nüngdak aika abensadakja anisüngzük agütsübaji plastic agi yangluba osettem asütsü. Kidang asenok amenba menden nungi tenzüker asenoki amshiba wastebin, toothbrush, tzü bottle, auso, marok, chiyongtsü ayuba pongdang aser dokan nung aliba osettem abenba yangku aser ano zünger mezüngma plastic agi yangluba osettem asenoki amshir. Item osettemji jenjanga dalang aser mapanga talangka amshir. Ano, plastic agi yangluba osettemji tepongba aser lokteper dena amshir, anungji tebenshitsü aser tamshitsü melamelar. Ajisüaka, plastic agi yangluba osettem ajanga asenok anisüngzük anguba o takoksa anguba na medemdangra, plastic amshiba ajanga bener arutsüba takoksatemji tuluba aser asenok asoshi shisabolutsüka lir. Plastic yabo kodanga ali küma oa mashier, anungji asenoki amshir endokba plastic ajak ya tzüi aser mopongi ponga bener oa tesem ka nung tenem küma nangdener aser iba jagi tzüim nung aser ali madak timtem aika ataloker. Aji oda, tang amaisa ao nungbo 2050 küm tashi nungbo tzüyim nung ango dang nungibo plactic tiemba alitsü ta scientist-temi asadangtetter. Iba kasaji kodang alijak nunga asenoki endokba plastic agi süngdir, item li nungji süngdonglidong memeitsü. Item ama tebilemtsüji reprangtetba agi, joko akok tashi alima nung plastic mamshitsü meranger. Aji oda, government-ia nübortem dang plastic mamshitsü ajungshir aser ozünga agütsür. Ajisüaka, tang ajungbena plastic agi yangluba osettem ajakbo metoktsütettsü, anungji plastic melen kechi amshitsü ta bilemdanga temelen yanglu tenzüktsübaji kanga tongtibang aser nüngdak mapa ka kümogo. Teshisadanger aser teinyakner atemabo iba ama temelenshi aruba mapang ya temoatsü aser maongka agitsüba mapang tajung ka asütsü. Atangji, nübortemi plastic agi yangluba osettem dang amshir asünungji, plastic agi osettsüset tapu balala yangluba ya industry tulu lir, anungji kodang plastic agi yangluba oset ajema amshitsü tenzükdir, parnokia ano temelen yanglu tenzüktsü. Ajisüaka, asenok ama rongsen maka aser nüboa peria mali ta asüba nübortem atemabo tamasayongi industry lapoka nüngdak osettem meyanglutettsü, saka asenok teka aser temeyong agi plastic melen amshitsü oset aika yanglutettsü. Aji oda, tatsüba agi plastic agi yangluba polythene bag melen asenoki osangkaket tejen agi shishilembadak amshitsüla yangku yanglutettsü. Iba ama yangkuji anogo nung 500 yanglur yangkuji ka nung senpak kaka agi yokra sen 500 bo melamelaa aatsü. Iba amaji asenoki lokti nung chiyongdang amshiba auso aser marok ya süngo tu agi yanglutsüa akok. Itemji yanglur ka nung sen pongo danga meshia nunga sen aika aatettsü. Iba amaji auso aser marokji aou aser warok süngküm agi jungjunga yanglutsüa akok. Item aosu aser marokjibo jungjunga yanglura kiyir benjong aser lokti senden nung amshitsü atema raktepa alitsü. Joko, plastic melena amshitsü asoshibo ali, kaket, süngküm, süng aser süngo tu agi yangluba osettem asütsüla. Itemji bilemdanga tanü plastic agi yanglur amshiba osettem ya asen lima nung anguba osettem agi asensasa yanglua amshitsü merangtsüla. Iba amaji asenoki inyaktetra asenok asoshibo asen lima nung plastic mamshitsü ozüng azüngba ya temoatsüang asütsü, kechiyong asenoki plastic-bo meyanglutetter saka plastic melen amshitsüba osettembo asenoki asenoksasa melamelaa yanglutettsü. Atangji, alima nung plastic kenyongi mamshiibo asenok nüngdak meperitettsüa akok, anungji karbo amshitsüsa adoktsü. Ajisüaka, tang amshiba amai mashimashi mamshitsüla. Tangbo asenoki amshiba plastic bag, plastic pongdang aser osettem mashi nung endoker, ajisüaka itemji tesem ka nung bendena yur, ano item jagisa tanaben menüngsar (recycle) nüngdak osettem yangludak agütsüra, iba jagi alima meraksatsü saka tajangzükbo angutsü.