BJP, JD(U), NPP aser Independent MLA tem PDA nung masetshii lir

Kohima, Yimpoksüi (November) 8 (TYO): NDPP-i aniba PDA sorkar nung teyaritepertem- BJP, JD (U), NPP aser Independent-i tanü Nagaland nung PDA sorkar maneni posema nungittsü nangzükogo.
PDA teloktep nung NDPP MLA 17, BJP nungi 12, NPP nungi 2 aser JD(U) o Independent MLA ka ka dena lir.
BJP MLA aser Deputy Chief Minister, Y. Patton-i PDA nung yaritepertem dang nübortem tsüngdang terenlok bener arutsü aser state indang rongsenkettsüng jenjang ajungkettsü atema election mapang nangzükba mamatsü metetdaktsü.
PDA-i inner party discipline tiptema ayutsüla aser züngsem shia putepa aser longjema alitsü atema mapa inyaktsüla, ta Y Patton-isa ashi.
“PDA züngsemtem tsüngda telemsa adoka lir aser ECI-i NDPP de-recognition asütsü ta Opposition-i olulu prokshir. Ajisüaka, NDPP-i timtem ajuru süra kechiba BJP nungi onok MLA 12-i PDA teloktep nung adentsü?” ta paisa asüngdang.
“Opposition party-i loksatsütsü meranger saka BJP-i NDPP den noktaka lir aser posema nungiter. Onoki election magidang nangzükba meraksatsü. Nenoki (NDPP-i onok toktsütsü akok, saka onokibo (BJP) nenok kodanga metoktsütsü” ta Patton-isa shisem.
JD(U) Nagaland MLA aser Agriculture and Cooperation Minister, G Kaito Aye-ia o jembidang “Naga yimten melatetba ajanga Nagaland ya terenlok angutsü aser tejakleni aotsü atema timtemer saka asenok longjemerprangla, iba alizüngji tongtettsü” ta ashi.
JD(U)-i PDA lennirtem maneni nungittsü anungji asenok arishir nem maongka magütsütsü atema PDA nung yaritepertem ajak külemi longjemer noktaktsü mepishir. PDA tejakleni odaktsütsü aser Naga loktiliba nung nangzükba ama temelenshi bener arutsü atema party tem tsüngda putepa alitsüla, ta paisa ayongzük.
PWD Minister, Tongpang Ozukum-ia Independent MLA ka ama PDA sorkar nungiter aser pai ashiba agi, “Nagaland nung teloktep sorkar ka lir aser iba sorkar ya Chief Minister Rio aser Deputy CM Patton na lenisüba kübok tashi taitba akümtsü.”
“PDA züngsemtem ajak nangzükba ama noktaka lir aser onoki lenisüba nung temulung asür aser iba lenisüba posema nungittsü” ta paisa shisem.
Election mapang onok tangatetba aser asalentong balala yur toktep saka tang onok Common Minimum Programme ka kübok lir. Anungji MLA tem dang masü saka PDA party züngsem ajaki telok ka ama mapa inyaktsüla, ta Tongpang-isa ayongzük.
NPP Nagaland president Ato Yepthomi-ia Nagaland nung PDA sorkar tiptema ketdangsüa aotsü atema par MLA ana aser party-i sorkar den akokba tashi amalitepa yariteptsü aser nungittsü ta metetdaktsü.