Youth Congress-i RBI office Headquarters kima longkak ait

New Delhi, Yimpoksüi/November 09 (Agencies): Tanü Youth Congress züngsemtem aser Congress party lenirtemi New Delhi nung aliba RBI office kima demonetisation anema longkak ait aser iba mapang nung police-i longkak aitertem apu.
Security sepaitemi longkak aitertemji pua bus ka nung police station-i anir ao.
Police-i ashiba agi, Congress Party züngsem 70-80 shi apu, aser parnok rongnung Ashok Gehlot, Anand Sharma aser Bhupinder Singh Hooda nunger densema liasü.
Longkak aitertem jagi tejak nembanger BJP-i aniba sorkar anema yimyim ayima liasü.
Youth Congress nung National otongdar, Amrish Ranjan Pandey-i, Modi yimsüsüba kübok tesüiba küm ana nung linük timtemba metetdaktsütsü nükjidong nung Youth Congress-i longkak aiter, ta metetdaktsü.
“Modi sorkari demonetisation tamakok ngua benokba ajanga sensakertem timtemdaktsüba osang sangdongtsü atema longkak aiter,” ta pai ashi.
2016 küm November 8 nü Ato kilonser, Narendra Modi-i senpak 500 aser 1,000 notes anenja liasü, iba sülen bank aser ATMs nung sen notes tasen melentsü atema nokdakdang nisung 100 dak tema asü.
Yashi Anand Sharma-i, Demonetisation benokba sülen küm ana ajungba anogomong nung Congress party-i linük tesem ajaklen longkak aittsü, ta sangdonga liasü.
Congress dak alia tanga opposition party temia demonetization ya linük atema majung liasü, ta aitsür.
Yashi Congress lenir aser taoba mapang Ato kilonser, Manmohan Singh-i, demonetization ajanga yirutsüba tarak maneni angur, ta aija liasü.