Tripura nung May Day agienba anema CITU-i lungkak ait

Agartala, Yimpoksüi (November) 9 (Agencies): Communist Party of India – (Marxist) (CPI-M) indang trade union kongsangi yashi Agartala nung lungkak aitba sentongka agi.
Tripura nung Bharatiya Janata Party-Indigenous People’s Front of Tripura (BJP-IPFT) teloktep sorkari official holidays nungi May Day agienba anema Centre of Indian Trade Union (CITU)-i lungkak ait.
2019 nungi Tripura Government holiday list nung May 1 ya public holiday masütsü. Iba anogo ya restricted (optional) holiday ka dang asütsü.
Yashi CITU office nungi tenzüker lungkak aitertemi Agartala yimdong nung BJP-IPFT sorkar anema yimyim ayima senzü.
Tripura sorkar indang official holidays tarensen nungi May Day agienba ajanga BJP-IPFT sorkari sensakertem anema inyakba jungkai adoka sayur, ta CITU State secretary aser MP, Sankar Prashad Datta-i ashi.
Tripura nung Left Front sorkari 1978 nung May Day ya public holiday ka ama amungtsü sangdong aser tesüiba küm 40 tashi Government holiday ka ama munga aru, ta paisa ashi.
“BJP sorkari ibaji melenshiogo aser 2019 nungi International Labour Day ya Tripura nungbo public holiday ka ama mamungtsü, kechiyong BJP-i sensakertem atema mebilemtsür” ta Datta-isa shisem.