India-i Taliban den ken o mejembitsü: MEA

New Delhi, Yimpoksüi/November 09 (Agencies): India-i Taliban den ken o jembitsü, ta osang prokba mapang ka nung tanü Ministry of External Affairs (MEA)-i, Russia yimtiba, Moscow nung Afghanistan atema senden aliba mapang nung India-i Taliban züngsemtem den ken o jembitsü ta jembiba osangji tai, ta jangjatsüogo.
Tanü New Delhi nung osangbenertem senden ka nung jembidang MEA otongdar, Raveesh Kumar-i, Taliban den ken o jembitsü madoker, ta ashi.
Taoba mapang Jammu & Kashmir Chief Minister aser National Conference lenir, Omar Abdullah-i, Centre-i Taliban denbo ken o jembir saka Kashmiri stakeholders denbo ken o mejembir, ta aitsüba sülen MEA-i iba osang jangjatsür.
Kumar-isa, India-i Afghan reconciliation nung non-official level nung shilem agitsü, aser senden amenba kasa takdang nung Taliban züngsemtema alitsü, ta metetdaktsü.
Taoba mapang J&K CM, Omar Abdullah-i Jammu & Kashmir onük atema sorkari ken o mejembiba atema aitsü.
“Modi sorkar atema Taliban densema aliba senden nung “non-official” süa shilem agira kechiba J&K nungbo non-mainstream stakeholders den “non-official” ken o mejembiteter?” ta Omar-i twitter ajanga aija liasü.
MEA otongdar Kumar-i, India-i Afghanistan nung yimjung, tesünep aser azükaru alitsü atema nungittsü, ta metetdaktsü.