Congress-i 10 nü tsüngda aluyimertem sentsüh atoktsü: Rahul

Kanker, Yimpoksüi/November 09 (Agencies): Ato kilonser, Narendra Modi aser Chhattisgarh Chief Minister, Raman Singh na aija tanü Congress Party Tir, Rahul Gandhi-i, tenapronglai par medemer industrialist dang nungi temelaba magiibo kecha meinyaker, ta aitsü.
November 12 nü Chhattisgarh assembly election mezüngbuba shilem agitsü lia Rahul-i, Modi aser Singh nati yazü nangzüker aser nangzükba ama meinyaker, ta aitsü.
Tanü Kanker district kübok Pakhanjore jila nung election nüboyim senden ka nung jembidang Rahul-i, “Bastar nung ali nungi adokba rongsen jenti lir, ajisüaka lisopurtemi item tajangzükji magiteter. Item tajangzükji Modi aser Chhattisgarh CM nunger medemer industrialist kari dang agir,” ta metetdaktsü.
“Delhi nung Modi indang industrialist medemer 10-15 shi lir, iba denji kasa Chhattisgarh CM-a shishilembar medemer 10-15 lir. Modi aser Singh nati item medemer 10-15 dang nungi temelaba magibo kecha meinyaker,” ta paisa aitsü.
“Centre nung Congress-i aniba sorkar alidang küm ka nung MNREGA scheme atema sen crore 35,000 lemzüktsü, aser iba project ajanga linük nung nisung aika tajangzük ngudaktsü,” ta pai ashi.
“Tesüiba küm pezü ser tesadang nung Modi-i par medemer industrialist 10-15 shi dang sen 3.50 lakh crore sentsüh atok. Iba senji ajanga MNREGAs 10 agutsütetla,” ta pai ashi.
Rafale deal dak sendakba nung Rahul-i, “Modi-i linük meyong Hindustan Aeronautics Limited (HAL) dang nungi Rafale fighter jets contract rakzüker Anil Ambani nem agutsü,” ta aitsü.
“Ambani-i tayimtsü ka danga meyangludang, saka Modi-i HAL dang nungi iba contract ji rakzüker Ambani nem senpet crore 30,000 agutsü,” ta pai aitsü. Chhattisgarh nung aluyimertem dak sendakba nung Rahul-i, state nung par party-i sorkar tentetra parnoki aluyimertem timtem atema inyaktsü, ta nangzük.
“Onoki Chhattisgarh nung sorkar tentetra onoki anogo 10 nü tsüngda aluyimertem dang sentsüh atoktsü,” ta pai nangzük.
“Congress-i sorkar akumba sülen Madhya Pradesh aser Chhattisgarh naji linük nung Punjab aser Haryana na ama agriculture centres kümdaktsütsü,” ta pai shisem.