Congress-i urban Maoists pusema rara adokdaktsür: PM Modi

Jagdalpur (Chhattisgarh), Yimpoksüi/November 09 (Agencies): Tanü Ato kilonser, Narendra Modi-i, Congress-i yimtitem nung jangratema aliba Maoist tem pusemer saka sensaker tribal nisungtem timtemdaktsür, ta aitsü.
Taruba hopta Chhattisgarh assembly election agitsü lia tanü Bastar kübok Jagdalpur nung nüboyim senden ka nung jembidang Modi-i, Congress-i urban Maoist tem pusemba kuli agutsütsüla, ta ashi.
Piasa, “Urban Maoist temji air-conditioned kidang alir, bendanglen azünger, gari tajung nung senzür saka parnoki remote control amer yangi aliba tribal sensaker lanurtem timtemdaktsür. Kechiba Congress-i item urban Maoists pusemer?” ta asüngdang.
Tesüiba küm aika Maoists telungpurtemi Bastar region nung timtem agüja arudar, aser Modi-i ashiba agi, Maoists ji mojing aser melungsentsü tamajung lir.
Paisa, Maoists-i timtem agüjaka par sorkari state nung Maoist-i timtem agutsüba tesemtem nung terenlok mapa inyaktsü aser Chhattisgarh nüburtem nem facilities tajung agutsütsü, ta metetdaktsü.
Chhhattisgarh state ya 2000 küm Madhya Pradesh nungi alangtet, aser iba dak sendakba nung Modi-i, “Chhattisgarh küm 18 jungogo. Kodang tanur ka arishi küm 18 jungdir tsüraburi budget lemzüktsür. Delhi nungi sorkari arishi küm 18 Chhattisgarh terenlok atema asameyanger,” ta ashi.
Taoba sorkartemi Bastar region atema peria meinyaktsü, ta aija Modi-i nübur dang BJP nem vote agüjang, ta mepishi.