Modi’er demonetization ajanga India rongsenkettsüng raksatsü

Guwahati nung aliba Congress head quarters nung taoba Union Minister & Rajya Sabha MP P Chidambaram-i osnagbener senden ka nung o jembidang agiba noksa angur.

Guwahati, Yimpoksüi (November) 9 (Agencies): Taoba Union Finance Minister aser Congress lennir tejen P Chidambaram-i demonetization atema Centre nung Bharatiya Janata Party (BJP)-i aniba sorkar aitsü aser paisa ashiba agi demonetization ajanga linük indang rongsenkettsüng jenjang raksatsü.
Hokolbarnü Guwahati nung aliba Rajiv Bhawan nung osangbener den jembidang Chidambaram-i iba olen jembi.
“Tesüiba küm ana tashi India-i senotsü khuret tulu ajurua lir. Demonetization sülen küm ana tsüngda India nung rongsenkettsüng jenjang kanga raksaogo” ta pai ashi.
Iba mapa ya nisung ka mesüra kari junga mebilemdangi inyakba liasü aser item nisungtem jagi sen aser rongsenkettsüng dak sendakba tebilemtsütem memetet, ta Chidambaram-isa shisem.
“Peii aibelenogo ta menangzükba sorkar kati kodanga aibelen nungi mangazüktsü aser iba sorkar jagi linük madak ketdangsütsü malang” ta paisa metetdaktsü.
BJP-i sorkar akümba sülen parnoki taoba Lok Sabha election matongdang nangzükba mapatem inyaktsü atema memerang ta Chidambaram-isa aitsü.
Parnoki election magidang küm ka nung mapa crore 2 adokdaktsütsü aser aluyimertem anasü agi teimba ajangzükdaktsütsü ta nangzük saka Centre sorkari yamaji inyak asü koda? Narendra Modi’er sorkari totzü aser kechisarena ajak nung jenjang kanga ajungket, ta paisa ashi.
BJP sorkar kümsük joko tembangtsü mapang tonga aruba agi parnoki Hindutva agenda temai adokdaktsüogo, ta Chidambaram-isa shisem.
“BJP sorkari linük nung reju tongtipangtem raksatsütsü mesüra atsünga agitsü meranger. Tang tesüsabubaji Reserve Bank of India (RBI)-i timtem ajurua lir. BJP-i central bank indang mapa memetet aser RBI Governor indang tashi akhüm metsübur” ta paisa metetdaktsü.
Chidambaram-i Assam semdangdang Congress lennirtem den ajuruteptsü sangküm Lok Sabha election atema party manifesto dak sendakba onüktem lemsateptsü.