PDA sorkari tiyazü jembir: NPF

Dimapur, Yimpoksüi (November) 9 (TYO): NDPP indang 3 buba General Convention nung Chief Minister, Neiphiu Rio-i PDA sorkari inyaktetba osang metetdaktsübaji chichiba nungbo tazüngla lir ta Naga People’s Front (NPF)-i tanü metetdaktsü.
NDPP indang general convention bangzüng renemba nung ‘O masü Mapa’ ta onük ka lemtet aser iba atema süngmanger, kechiyong iba kasa o ya 1977 regional political party- National Council of Nagaland indang manifesto nunga tetshia lir, ta NPF-isa ashi.
Rio-i Nagaland nung VIP sobaliba agienogo ta ashir saka iba ya Naga nunger atema asayamenü ka ama kümogo. PDA sorkari parnok kinungertem aser metettepa alirtem Govt. undertakings balala nung shimok aser iba atema state senpong sen tamagitsü nung endoker, ta parnokisa shisem.
PDA sorkari sorkar junga ketdangsüba aser tashishitsü melii inyaktsü jembidang anogo 30 tsüngda gari lenmang tajung kümdaktsütsü ta nangzük, iba sülen anogo 60 nungi anogo 100 ta melenshi saka tatem nung tzüngluruwa aruba agi lenmang meyangluteter ta tatemtsü amer kuli agütsü, ta NPF-isa ashi.
Tashishitsü melii inyaktsü atema sorkar tesayurtem Digital mapping asü ta Rio-i ashir saka iba mapa meinyaki tesayur nem ang itasen mapang shitak nung agüjang, kechiyong tesayurtem ya loktiliba nung tongtiret ama lir aser akhümtsübutsüla, ta NPF-i metetdaktsü.
Rio-i Delhi nung Rajnath den ajurutepba sülen Naga nunger ka küma lokteptsübaji tamakoktsü ta ashi anungji pai Naga nunger ka akümtsüba indang jembiba ajanga Naga nunger mashioktsütsüla, ta parnokisa shisem.
PDA sorkari inyaktetba mapatem rongnung Dimapur nung Pink bus tenzükba dena lir. Ajisüaka, Nagaland nung aliba tetsür nem pink bus agütsütsü nüngdak madoker, kechiyong tangalen ama masü saka parnok yangibo sadoksadoka aser lendong nungi jenbua alir. Tetsür nem pink bus agütsütsü melena sorkari tetsür nem shilem lemzüktsütsü ken o atema ang mapa inyaktsüla, ta NPF-isa ashi.
Nagaland nung Mini Horbill festivals amungba ya PDA sorkari parnok jangraba aser taginübatem atongtsü atema inyakba mapa ka dang lir. Kechisarena nung jenjang atuba aser lenmang tia kanga majungba atema Naga nunger timtemdang sorkari benjung amungtsü ayongzükba ajanga shisa maka ketdangsübaren sayur, ta parnokisa shisem.