Nagaland nung MR vaccination 100% atongtsü

Dimapur, Yimpoksüi (November) 9 (TYO): November 8, 2018 tashi nung osang aruba nung ajemdaker Nagaland MRVC ajanga tanur 4,19,460 nem mozü agütsüogo.
Nagaland kübok school 2,988 nung aser outreach sessions 2,332 agidang tanir lakh pezü dak tema nem MR mozü agütsü, ta State Immunization Officer, Directorate of Health & Family Welfare Dr. Atoshe Sema-i ashi.
Tang tashi nung tanur 93.52% nem mozü agütsüogo aser taruba anogo ishika tsüngda Nagaland-i 100% atongtsü ta department-i imlar. Administration, Colony/Ward/Village Chairman, tamangba lennirtem, NGOs aser health professionals-i Measles samatsütsü aser asen tanurtem Rubella tashidaktem nungi kümzüka ayutsü ta tangatetba akangakanga yur yaritepba ajanga iba tashi tongtetogo, ta paisa ashi.
MR vaccine ya government health facilities (District Hospital, CHC, PHC & Sub-Centre) ajak nung lir aser ita 9 nungi arishi küm 15 tashi tanurtem nem agütsütsü akok. School nung mesüra outreach sessions nung koda masüba timtem kar ajanga mozü magii aliba tanurtem nem nenok anasa aliba health facility-i oa mozü agidaktsütsü mepishir, ta Dr. Atoshe Sema-isa shisem.