Citizenship Bill ajanga ULFA (I) nem taküm tasen agütsü: Assam Special DGP

Guwahati, Yimpoksüi (November) 12 (Agencies): Ashishitep aketba Citizenship (Amendment) Bill, 2016 ajanga Paresh Baruah-i aniba ULFA (I) nem taküm tasen ka agütsüogo.
Iba Bill ajanga Assam nung Assamese aser Bengali oshi jembirtem tsüngda telemsa adokdaktsüogo aser iba ajanga timtem ajurutsü akok, ta Assam Police nung Special DGP (Special Branch), Pallab Bhattacharyya-i ashi.
Maneni tawa osang kar ajanga ULFA (I) Paresh Barua süogo ta prokshiba ajanga tensa mejungi akümtsü akok, ta Bhattacharyya-isa shisem.
“Assam nung Assamese aser Bengali oshi jembirtem tsüngda khuretji akhidang nungi lir aser Citizenship Bill ajanga iba mi tali jangrudaktsüogo. 1960s mapang oshi dak sendakba maparen ka inyak aser Assam movement tenzükdanga timtem kar ajuru. Saka ajakji süngjema orr lia tang tanaben iba khuret temai adokogo” ta paisa metetdaktsü.
ULFA (I) nung nisung aika züngsem akümer ta osang jembibaji tiyazü ta Special DGP (Special Branch)-isa metetdaktsü.
“September 1 nungi Udalguri aser Tinsukia district tem nung nisung 8 ULFA (I) nung züngsemogo. Parnok karbo puogo aser tang tashi nung iba osangji dang lir” ta pai ashi.
Citizenship (Amendment) Bill, 2016 ajanga December 31, 2014 tashi nung Bangladesh, Pakistan aser Afghanistan nungi aruba non-Muslim immigrants nem senso agütsütsü.