AR-i NSCN (K) züngsemtem apu

Kohima, Yimpoksüi/November 12 (TYO): Maruti Alto AS 01 V 1593 (Silver Colour) gari nung NSCN (K) züngsem senzüdar ta osang ka angazükba nung ajemdaker November 10 nü HQ IGAR (North) kübok Assam Rifles Kohima Battalion aser 164 Bn TA (NAGA) nati TCP Junction, Kohima nung Mobile Vehicle Check Post amenoker mita atadang NSCN (K) nung arishi küm 30, Finance Secretary, Avika Achumi (Henito Achumi’er jabaso, r/o 4th Mile, Diphupar) apu, ta AR sangdong ka ajanga metetdaktsü.
Tamalen National Security Act kübok pa anema ken o benoka lir aser yaküm December ita nungi bail nung chioka liasü. Pa ket nungi acknowledgment slip ana, cash receipt tenet, work permit asem, stamp ka aser tashishitsü documents apu, ajakji NSCN (K) indang liasü, ta kasa sangdong nung shia lir.
Iba sülen ano Kohima Battalion-i operation aoba mapang nung Avika Achumi den inyaksemer, NSCN (K) nungi arishi küm 34, Alo Rengma (asür Nchato Rengma’er jabaso, r/o Chunlikha, Tseminyu) apu. Alo Rengma ya sen akhangba atema 2017 küm June 22 nü pua liasü aser taküm February ita nung chiok, ta kasa sangdong nung shia lir.
Maneni bushisüngdangtsü atema tenaprong den tena ket nungi apubatemji OC, South Police Station, Kohima ket nung agutsü, ta kasa sangdong nung shia lir.