NE nung mezüngbuba ‘water handloom hut’ Manipur nung lapokogo

Imphal, Yimpoksüi/November 12 (Agencies): Tripura indang Forest and Tribal Welfare Minister, Mevar Kumar Jamatia-i Amungnü Northeast nung mezüngbuba ‘floating water handloom huts’ lapoktsüogo. Iba hut tem ya Manipur, Bishnupur district kübok Loktak Lake nung lir.
Jamatia-i sorkar ketdangsertem matsüngdang handloom hut pongu tashi lapokja liasü. Handlooms hut tem den külem iba tesem nung aliba nüburtem nem looms tem tentanga amshitsü atema sempet agütsüogo.
“Iba ya tetendanger ka dang lir. Onoki tetsürtem südakba nung shilem agidaktsütsü asoshi merangdangdar,” ta Director of Directorate of Handloom and Textiles, K. Lamlee Kamei-i ashi.
“Iba tetendangba maparen ya takok ngua ora iba project ya tuluba küma atsülanger inyaktsü,” ta paisa ashi. Iba jenjang ya raliwalir tali atsüa arutsü aser handloom nung sütakertem ajungkettsü nükjidong nung agir.