Nephilim ta ajaba nisung ya shibai yanglu aser kong liasü

– S. Medem Kichu, Lerie Colony, Kohima.

Iba indang ya Lipok tapu 6:4 nung shia angur. Lai nung yamai ashir, item anogo nungji alima nung Nephilimtem liasü, aser parnokji aso tulu aser alemli nungji tashi kartem liasü ta zülua angur.
Saka tawa adokba asen Laishiba nung yamai ang zülua lir. Item anogo nung alima nung aso tulu nisungtem liasü, aser parnokji alemli nungji Nokinkütertem aser shiratem liasü ta ang zülua angur. (Shiratem ya kechi dang ajar?) Nephilim ya Tsüngremi Adam meyangludang Lucifer-i yanglua alima nung liasü ta otsü jagi ashir. (Otsü züngyonga aludang tejangja metetsü). Süra! Koda sür pa original tenüng ya Aso tulu agi dang melentsü? Ibai ajanga Laishiba nung Lipok otsü ya mejangjai kümdaktsür.
Iba tekong nung shia aliba ajanga aseni meteter, Tsüngremi Adam meyangludang alima tesem kar nungbo nisung tapu kabo liasü ta meteta arur kechiaser Lipok tapu ka nungi pongu (1-5) tashi nung Adam & Eve na nungi jakzüka aruba indang dang shia angur.
Ano Lipok 4:15 nunga Kain Eden tsüki nungi aridokdang tsükchir nungi kümzüktsü atema tenütsü nung seal ka ajenoker ang yokba angur.
Bible commentator temia ketsa kuli agütsür, saka parnokia tejangja kuli ka monguteter. Parnokia yamai ang ashir, The Nephilim were the ancient of these supermen supposed to be the offspring of these spirit-human union, ta dang shiteter. Laishiba otsü nunga Kain ya alima nung mezüngbuba jabaso ta zülua angur saka pa Eden tsüki nungi aridoker to Eden anüdoklen Nod lima nung oagi ali aser idakji tetsür agiba angur.
Küm eshika süia ogo iba indang ya ni Laishir kar den lemsatepa laisü. Onoki kuli aika bushia iba indang ya ratettsü merang, saka kuli tejangja ka mongutet. Ni parnok dang yamai ashi, süra alima otsü nunga B.C.50,000 mapang (Old Stone Age period) nungi alima nung nisung aliba kuli aika bushiteta lir ji, item nisungtemji Nephilim tem ya asütsü akok ta ashi. Mesüra, Laishiba otsü nung Tsüngremi Edentsüki aser Adam yangluba küm B.C. 4000 nung ta zülua aliba ya tai asütsü akok ta onoki o tembang.
Ano Israel nunger otsü (The History of Israel by David R Hinson) nung ashiba agi B.10,000 mapang nung nisung telok ka shirnok Longpok nung dang lia senzü, parnok indangji ashir. There is evidence of cave dwellers living in the ancient near east as far back as 10,000 BC. Item nisungtemji Nephilim ji asütsü ta amanger, kechiaser parnokji talidak ki maka nung Longpok aser Süngdongpok nung dang lia senzü ta parnok otsü nungji shia lir.
Temalen shia aruba kuliji kodang bilemdangdir, item ya nephilim tem indang ashiba sür nung aseni kuli tejangja manguba agi Lipok kaküt azüngdang rata-mata agi dang sünger zünga aruogo.
Saka tawa adianu asür K.Philemon Lumtor-i züluba kaket “Temeshi laishiba tanüdangtsü” nung iba Nephilim indang ya shia lir. Pai ashiba agi iba otsü ya Tsüngremi pa dang pongmang nung ashiba aser ibai alima nung alir nisung ajaki metettsü atema züluang ta ashiba agi zülu ta ashi.
Pai ashiba agi alima nung Adam meyanglu dang shirnok liasü parnok dangji Nephilim ta ajar. Parnokji Tsüngremi Lucifer nem temelaba agütsür yangludaktsü, saka pai parnok dakbo asen dak aliba shisatsü aser tanela (Soul) inoka yanglutsü memela, aser parnokji yanglur küm billion aika parnok dang alima nung toktsü.
Lucifer-i yangluba nisungji aso tulu aser tashikartüm liasü, saka parnok dak asen dak aliba tajung aser tamajung metetba shisatsü mali nung parnokji teti raratepa aser tepsettepa dang liasü.
Libaliro nunga parnokji shiruru amai dang liasü. Tetsü, tebu, adianu aser kin kidong kecha telemsa mali nung, tetsür ajakji parnok kinungtsütem liasü. Iba jagi alima nung nisung kanga dang kara-a soyapokya-a ao aser alimaji menentsü. Iba kaket nung ashiba agi, item nisungtem ya yanglur, parnokji alima nung parnok kija dang küm billion aika lidaktsür aser Tsüngremi tesülen Eden tsüki aser Adam na yanglu ta ashir.
Lipok tapu 6 nung, iba mapang nungji alima nung aso tulu nisungtem liasü aser parnok dang Tsüngrem chirtem ta aja. Iba ya Lucifer-i yangluba Nephilim dang ajaba indang ashir, Kechiaser Lucifer ya khen mapang kabo Kodak nung Tsüngrem chir liasü. Iba yongjiang Mosai-a parnok dang Tsüngrem chir ta aja. Ano Züngdangba tapu 13:32 & 33 nung Nephilim indang ya shia angur. Israel nunger itangitertemi ashiba agi onoki idakji nephilim nungi aruba Anak chirtem angu aser parnokji aso tulu nisungtüm liasü. Bible Dictionary (ordervan NIV Exhausive concordance) nunga Anakji Nephilim nungi jakzük ta shia lir. The descendants of Anak came from the Nephilim.
Iba kaket ajanga Lipok 4:15 & 16, aser Lipok 6:1-4 nung alima nung tamasa yongi nisung tapu ka aliba nung ratettsüba atema asen ajaki Tsüngrem aser asür K.Philimon Lumtor nüm tenüngsang agütsüdi.
Talisa alima nung Tsüngremi Adam meyangludang Lucifer-i Nephilimtüm yanglua lidaktsü aser parnok mapang küm billion paikaji raratepa aser tepsettepa alima ajunga tammang agi sünger lia aruba akhi tejen lima (Ancient World) indang iba adianu asür K.Philemon Lumtor ajanga Tsüngremi asenok dang sayu nung pa-a menungra-a bilemteter aser Tsüngrem nem tenüngsang agütsüdi
Iba ocet azünger ajak Tsüngremi moajangma.