Tangar den kibong akümba Tripura tsür nungi ST agientsü

Agartala, Yimpoksüi (November) 12 (Agencies): Meghalaya nung lisopur tetsürtemi non-ST den kibong kümra Scheduled Tribe jenjang agientsü ta Khasi Hills Autonomous District Council (KHADC)-i bill ka agizükba sülen ita pezü lir, Indigenous Peoples Front of Tripura (IPFT) – Tipraha-ia Hombarnü kasa ozüng ka yanglutsü atema takhangba agütsüogo.
November 29 nungi tenzüktsü aliba Assembly winter session nung iba ozüng yangluang ta parnoki akhanger.
Taküm July nung KHADC-i bill ji agizük. Bill nungji tangar den kibong akümba Khasi tsüri asoba tanurtemji ‘non-Khasi’ ta züngshitsü lateta lir.
Party indang lokti senden nung takhangba 9 asr telemtetba 4 renem. Takhangbatem rongnung lisopur tetsürtemi non-tribal tebur den kibong kümrar la dak nungi ST jenjang agientsüba lir, ta IPFT-Tipraha president Aghore Debbarma-i osangbener dang ashi.
“Tripura nung lisopur tetsürtemi non-tribal teburtem den mashimashi kibong akümba osang onoki angazüker. Khowai ama tesemtem nung iba ya kanga bulua ataloker. Item tesem nung lisopur tetsür noklang nung shilem 50 dak temai non-tribal teburtem den kibong kümogo” ta paisa ashi.
“Tripura nung lisopurtem nütsüng yongsük agi tangar memeneper. Onoki ozü maitsü kümzüka yunür. Tetsürtem dang nungi ST jenjang agientsü atema Tripura Assembly nung ozüng ka yangludaktsünür” ta Debbarma-isa shisem.
Tripura nung non-tribal teburtemi lisopur kinungtsütem tenüng amer license permit aser mapatem agitsü meranger, ta IPFT-Tipraha vice president Budhu Debbarma-ia ashi.
IPFT-Tipraha-isa Tripura nung National Register of Citizens (NRC) yanglutsü atema takhangba agütsü. Parnokisa Citizenship Amendment Bill, 2016 anema noktaker.
IPFT-Tipraha ya BJP sorkar den yariteper IPFT nungi balaka razüka aoba telok ka lir.
“IPFT-i ‘Twipraland’ takhangba nungi pilaba ajanga Tripura nung lisopurtem ashioktsüogo. December ita tatemlen onoki New Delhi kübok Jantar Mantar nung state balaka tentettsü atema takhangba agütsütsü” ta Budhu Debbarma-isa metetdaktsü.