Meghalaya police-i Assam nungi shishilembar ka kümzük

Williamnagar, Yimpoksüi (November) 14 (Agencies): Meghalaya kübok Garo Hills nung Mongulbar anepdang Assam nunger süngmok shishilembar Tapos Maji pur ao saka tanü pa police-i kümzükogo.
Pa pur aoertemi pa arem nung yutsür jena ao. Tanep anepong tashi pa idakji liasü aser iba sülen Bansamgre yimtsüng nung ki kati ao aser idakji pa yipzük.
Pa Bansamgre tonga aoba sülen Rongsak nung aliba police nem osang sangoktsütsü aser parnoki pa Williamnagar-i anir ao.
Iba dak sendakba nung police-i Mongulbar nikongtsütsü temulung melemi bilemer ka puogo.
Iba nisungji Rongsak nunger Salsrang Mogo lir ta jangjaogo aser pa dang asüngdangya asüdang pai nisung kar aputsü tasa yangluba meteta lir ta nangzük aser parnok telok nung züngsem kar tenüng ashi.
Iba asoshi Chiading Police Station nung ken o ka benokogo aser tanüngba nisungtem aputsü atema bushisüngdang südar.
Tapos Maji ya Jita Maji’er jabaso lir aser pa Rongsak market-i aodang len tom nung Bansam Awe anasa apu.
“Pa apurtem ajak tejak meibanger liasü aser nisung kati pistol ka bena liasü ta osang angazüker” ta Superintendent of Police, East Garo Hills-i metetdaktsü.