Tanü ‘Gaja’ yipru agi Tamil Nadu aser Puducherry na kongshitsü

New Delhi, November 14 (Agencies): Tanü 11:30 ako meta ‘Gaja’ ta ajaba yipru mopung tesashi Southwest, southeast aser west central Bay of Bengal nung Chennai yimti nungi kilometer 490 pilar liasü, aser ibaji west-southwest tsütsüleni ona taruba ghonda 14 tsüngda ano tesashiba akumtsü, ta osang ka ajanga metetdaktsü.
Iba yipruji west-southwest tsütsüleni aontsü aser tera süngjemer Brihostibar nikongdang Tamil Nadu tzüyimkümlen Pamban aser Cuddalore na tsüngda atongtsü; iba mapang nung mopungji ghonda nung kilometer 100 tashi tekara asutsü, ta Indian Met department-i metetdaktsü.
Bodhbar nikongdang nungi tenzüka north Tamil Nadu aser Puducherry na den south Andhra Pradesh tzüyimkümlen mopung sashia aontsü aser Brihostibar nungibo Tamil Nadu aser Puducherry tzüyimkümlen mopungji ghonda nung kilometer 100 tashi keraa aontsü.
Met department-i, Gaja yipru atongba mapang nung Tamil Nadu kübok Nagapattinam, Thanjavur, Pudukkottai aser Ramanathapuram district tem kongshitsü aser Puducherry nung Karaikal district kongshia teraksatsüba jenti alitsü, ta metetdaktsüogo.
State ketdangsertemi angopurtem dang November 15, 2018 nü tashi Tamil Nadu, Puducherry aser south Andhra Pradesh tzüyimkümleni angopui maotsü tekümdangtsü metetdaktsüba den külemi anogopui oa alirtem danga tekaraba nung meyipa arutsü metetdaktsüogo.