Kolasib nung Save Mizoram Movement sentong agi

Kolasib, Yimpoksüi (November) 14 (Agencies): Bodbarnü Kolasib district nung NGO Coordination Committee-i Save Mizoram Movement sentong ka agiba ajanga jila nung kecha meinyaktet.
Tesüsabuba electoral rolls nung Bru voter 218 enoksemba atema DC aser district election officer Dr T Arun mapa nungi anenjang ta takhangba agüja parnoki lungkak ait.
Hombarnü Kolasib NGO coordination committee-i district election officer Dr T Arun nme quit notice ka agütsü.
Bru voter tem junga mereprangi aser kulikaket peria melii electoral rolls nung züluok ta parnoki pa dak tai tongloktsür.
Mongulbar nikongtsütsü 5:00 ako tashi nung election office-i eviction notice agütsüba ama mapa inyakang ta Kolasib Joint NGO coordination committee-i mapang latettsü.
Ajisüaka, Dr T Arun-i Election Commission of India tetuyuba kübok mapa inyak ta tekong meranga noktaker.
Iba jagi tanü nisung meyirjang aika DC office kima adenshir lungkak ait. Iba mapang NGO Coordination Committee züngsemtemi Dr T Arun mesüka yanglur rongdok.
Taoba mapang NGO Coordination Committee-isa Gauhati High Court nung Dr T Arun-i Bru voter 218 tim mesüi züluok ta ken o ka benokogo.
AERO temi magizükba tenüngtem pai agizük ta parnokisa ashi.
“District election officer-i Bru voter 218 tashi züluok. Parnok ya Tripura nung relief camps nung alirtem aser jungjunga mereprangi züluok” ta NGO coordination committee-i ashi.
Bru voter tasentem züluoktsü süra Bru relief camp tem nung parnok kanga junga meteter ang züluoktsüla ta NGO-i aiben mepishia arur.
Mizoram nung Bru nunger khuret ajanga Mizoram CEO S B Shashank aser Mamit Deputy Commissioner Bhupesh Chaudhary na mapa nungi anentsütsüsa aküm.
Electoral rolls nungi Bru voter 218 tenüng magien tashi aser Dr T Arun-i Kolasib toktsür mao tashi parnoki lungkak aittsü, ta tanü NGO Coordination Committee-i metetdaktsü.
Parnokisa Brihostibarnü sentong tuluba ka agitsü renema lir. Asüng Kolasib nung school tem aser sorkar reju ajak shibangtsü ta committee-isa ashi.