MTH-i Ahuna benjung ayonga among

Dimapur, Yimpoksüi/November 14 (TYO): Aluruwa sülen Sema nungeri amongba ‘Ahuna’ benjung tanü Mishikito Totimi Hoho (MTH) den Mishikito Students Union (MSU) aser Mishikito Village Council (MVC)-i ayongzüka Mishikito ground nung mongogo.
Iba benjung nung tongti tejaokerji Directorate of Health & Family Welfare, Joint Director Dr. Hotokhu Chishi liasü aser “Ahuna Papuh” ji Mishikito village GB, Kughaho D Chophy liasü, ta MTH-i sangdong ka ajanga metetdaktsü.
Iba sentong nung tongti tesemdanger o jembidang Chishi-i, iba benjung koda tongtibang, koma tenzük aser putu aika benshia aruba indang lemsatepa liasü.
Paisa lokti dang, sobaliba wazüka benshiba ajanga lanurtemi angazüka tarutsü nung maneni benshitsü, ta ashi.
Tayongzükba o jembidang Western Sumi Totimi Hoho (WSTH) Tir, Jolly Zhimomi-i Mishikito-i achaayanga iba ama sentong ayongzüka nüburtem longjemdaktsüba atema pelaba lemsatepba den külemi sobaliba ajungkettsütsü aser wazüka ayutsü ayongzük.
Iba sentong ya Kuholi Assumi aser Hukato Assumi na leniba nung agi, Hovitoli Aye-i sarasadem aser GB Kughaho, D Chophy-i lokti pelaa agizükba o jembia liasü.
Kasa sentong nung Lashosa women Hoho-i lokti agizükba ken ka aten aser Tolito Kinimi-i ‘Leshe’ ajanga shilem agi.
MSTH Tir, Helen Kinimi-i tepela anküp o jembi aser NCRC Associate Pastor, Atoli Achumi-i sentong tembanga sarasadem.
Kasa anogomong nung sobaliba saisapong aser tanü putu saisapong balala asayaba sülen tongti tesemdangeri certificates lema agutsür Ahuna benjung tenzük.