Aotsür ka puer aoba atema DALT-i aitsür

Dimapur, Yimpoksüi/November 14 (TYO): NSCN-IM züngsemtemi Aotsür ka pharmacy nungi puer aoba maparenji Dimapur Ao Lanur Telongjem-i sashia aitsür, ta DALT Tir, Aotemsü aser tongti tezülur, S. Pangertoshi nati sangdong ka ajanga metetdaktsü.
“Iba ama tim masüba mapa ya Naga nunger sobaliba aser tangatetba den khenyongi mapet. Nisung kar jala, kinüngtsü, aianu mesüra tetsü ka ama tetsür ka dak yamaji inyakbaji kuli kecha agia medentsütsü makok,” ta DALT-isa metetdaktsü.
Dimapur police-i nisung apurtem apuba atema Dimapur Ao Lanur Telongjem-i parnok nem tenüngsang agutsür, iba denji külemi ochi temeden agutsütsü aser Dimapur nung ozüng benokba maparen nung DALT-i police den amalitepa alitsü, ta parnokisa metetdaktsüogo.