ANCSU Collegiate Meet anogo anabuba amung

Dimapur, Yimpoksüi (November) 14 (TYO): Tanü Public Works Department (PWD) Minister Tongpang Ozukum-i All Nagaland College Students Union (ANCSU) Collegiate Meet sentong lapoktsü.
Taoba mapang pai ANCSU den inyaksema aruba indang bilemteta tanü Tongpang-i o jembi aser bangdak department tem, Nagaland University aser state sorkartem külemi longjemer kaketshirtem indang sempettem ajungkettsü atema iba mesükba sentongtem ayonga agitsü ayongzük.
Saisapongba ya benjungteptsü atema dang masü saka longjemba mapang ka lir, kechiyong saisapong nung oshi telemsa kecha mali. Kaketshirtemi tangatetba tajung nung saisapong balala nung shilem agitsü ayongzüker, ta paisa shisem.
Sentong nung mendenji Co-convenor Organizing Committee Dievo Yano liasü aser Dimapur Lotha Baptist Church Associate Pastor John Ovung-i temoatsü meshia sarasadem.
Organizing Committee Convenor Tsukjem Lkr-i okila jembidang ANCSU Collegiate meet ajanga kaketshirtem nem wadang balala nung maongka agütsüba osang lemsatep.
Paisa kaketshirtem dang collegiate meet ama sentongtem nung shilem agiba ajanga ANCSU indang alizüng aser taginübatem tongdaktsütsü merang ta ayongzük.
ANCSU President Katho P Awomi-i Presidential Address jembidang, state sorkari education nung sports aser tanga co curricular activities dendaktsütsü atema ayongzük.
Sentong nung Kohima College Kohima nungi Neilaü Thaprü-i ken ka aten aser Games & Sports incharge Benjong Longchar-i tezüngzüktep agidaktsü.
Tanü saisapong nung football (men), volleyball (women) aser badminton mixed doubles asaya.
Maneni, November 15 nü saisapong balala asayatsü aser Beat Contest nung Rural Development Advisor Dr. Neikiesalie Nicky Kire-i mejeta jaoker ka ama shilem agitsü.