Kohima DPDB Day out den Khristmas jeli sentong agiogo

Kohima, Yimpoksüi/November 15 (TYO): Kohima District Planning & Development Board Day Out den Khristmas jeli sentong November 14 nü Tora Kezoma nung agiogo, ta ketdangsertem osang ka ajanga metetdaktsü.
Advisor Youth Resources & Sports aser Chairman Kohima DPDB, Er. Zale Neikha-i salem osang abenba den külemi iba sentong junga ayongzükba atema tayonger team dang pelaba lemsatep.
Paisa, tanga district den medemdangra Kohima DPDB-i lenmang aisü nung aika inyaktetogo, aser ibaji meranga inyakba, amalitepa inyakba aser züngsemtemi kanga nendaka inyakba ajanga lir, ta ashi.
Paisa Board züngsemtem den Khristmas aser New Year tepela tulu den temoatsü kaa mongtettsü moatsü.
Iba sentong ania Deputy Commissioner & Vice Chairman DPDB Kohima, Rajesh Soundararajan, IAS-i, Er. Zale leniba kübok Kohima DPDB-i ano jenjang tajungba tongtettsü aser tanga districts dang tatishitsü tajung sayutettsü, ta ashi.
Paisa HoDs dang taruba Hornbill Festival atema renema alitsü mepishiba den tim departments dang November 25, 2018 tashi nungbo osang renemtsü metetdaktsü.
Paisa züngsemtemi DPDB maparen balala nung amalitepa inyakba aser shisatsü agutsüba atema pelaba shisem.
Sentong tetenzüklen Sr. Pastor, Kezoma Baptist Church, Soleho Kiso-i Tsüngrem temoatsü meshia sarasadema liasü aser DPO (Planning), Heinswading Liegise-i tepela anküp o jembiba sülen Christmas Gift Exchange agir lokti chiyungtep.