Benjung ajanga asen maitsü wazüka ayur: P.B. Acharya

Yimpoksüi/November 15, 2018 nü Pughoboto local ground nung Thuwini lapoktsüba sentong nung State Angh, BP Acharya-i Kitami yim nem ‘Cleanest Village Award’ agutsüba noksa nung angur.

Kohima, Yimpoksüi/November 15 (TYO): Tanü Pughoboto local ground nung Nagaland Angh, P.B Acharya-i 4buba Thuwuni benjung tenzüktsüogo; iba benjung ya anogo asemnü tashi amongtsü, ta ketdangsertem osang ka ajanga metetdaktsü.
Iba benjungmong tetenzük sentong nung National Anthem aser Aphuyemi Anthem atem. Iba sentong nung tongti tejaoker, Angh-i sobaliba yimya nung mi aputsü (Itsa).
Sentong nung jembidang Angh-i, nüburtem longjemdaktsüba atema Tsüngrem nem tenüngsang agutsütsü asoshi iba benjung amonger aser benjungmong ajanga asenoki asen maitsü aser tera jangjar, ta ashi.
“Asenoki tetsü oshi tongtibang süa züngshitsüla. Shisaliok jenjang melenshitsüla, koba ajanga asen yimtsüngtem tashi aittsü aser tashi angutsü,” ta pai ashi.
Yimtsüng shiaji balala, ta shia pai iba tesem nung MLA aser Ambassador of Swachh Bharat den Convenor, Alobo Naga leniba nung team-i inyakba mapatem atema tenüngsang agutsü.
“Asen shisatsüji pei kija atema masü saka lokti ajangzükdaktsütsü atema asütsüla. Asenok akasodaktsütsüla aser teshisadangba melungsentsü melenshitsüla, mesüra India kodanga tashi maittsü,” ta pai ashi.
Paisa Pughoboto nüburtem dang nija college ka amenoktsü ajungshia liasü.
Kasa sentong nung MLA, Y. Vikheho Swu-i Thuwuni benjung tenzükba indang metetdaktsüdang pai, Thuwuni benjung tetezü “aintsü mesüra tejakleni aotsü” lir, ta ashi.
Paisa, takümbo parnoki Thuwuni atema anogo balaka shim, kechiyong yim aikati Sumi nunger aluruwa sülen benjung ‘Ahuna’ parnok jurila mongnüa liasü, ta ashi.
MLA-i, Thuwuni benjung mapang tanga aika rongnung lokti kanga puadaktsübaji kentenmenü lir, aser ibaji Alobo Naga-i benjung mapang linük tesem balala nungi kentenertem anir aruba ajanga lir, ta ashi.
Paisa, taküma Alobo Naga-i Pughoboto-i International artist tem anir aru, aser ibaji ajanga Thuwuni ya international sentong ka kümdaktsüogo, ta ashi.
Paisa, iba benjungmong nükjidongtem jangjatsü aser tongtettsü atema Pughoboto nung alirtemi amalitepa inyakdaktsüner, ta mepishia metetdaktsü.
Swu-i, iba benjung amongba tongti nükjidongji tesem nung rongsenkettsüng ajungkettsütsü atema lir, aser ibaji ataloktsü atema lisopurtemi tsünütetba aser yangluba products amshitsü parnoki lemtetogo, ta ashi.
Kasa sentong nung SDPDB Pughoboto Chairman-ia jembia liasü.
Tanü Swachh Bharat Marathoon race-a agi aser state Angh, B.P Acharya-i Marathon nung takok angurtem aser Cleanest Village Award 2018, Kitami village nem sempet agutsü.
Ano Tree plantation awards Shesulimi, Natsumi aser Chisololimi yimtem nem aguja liasü.