Naga nungeri tangar memenep

~ P. Yanglu Lkr, Signal Bosti, Dimapur.

Nagaland State ngur joko küm 56 abensadi asür, saka asen lima ainba nung asen tang tesü state angur dang nungi asen teküpoktiba jenjang nung lir. Medical College maka, Diploma Engineering anarongtena ka akaba dak alaka asenok akatsü nüngdakba tongtipang tangazükdak Reju tangar akaba maka. Oset tsüset adokdak Mills, Factories tem maka, taoba küm Dimapur atema Electrical Department-i transformer tulu ka bushi aser aji Arunachal State nungang yanglua akaba jembiba angazük.
Asen lima nung tangar akaba tangazükdak Reju tem maka, ya Sorkar dak dang tongtsütsü mali, saka asen nübur tila-tulu na dak tangar menüpa inyaktsü shisatsü aser tashi maliba ajanga ta meteter. Asen nübur kechia telokia pei taginüba tongtettsü atema Sorkar anema Mokdanga tashi amshia inyakba tanü tashi mali. Shidi süra tanga State tem Assam, Manipur ama Students teloki anir lenirtemi nübur anema tim masü inyakba anema mokdanga tim nungbo tashi amshia Azü tashi tokshitepba ajanga tangar akaba ajak kateta, tongteta aor, saka asen nübur dak iba tashi inyaktsü nübu, rongsen shisatsü aser taküm bendanga agütsür maliba ajanga lenirtemi parnok sünütsü asür, aor, jembir, inyaker, tenokdanger mali, ya koda asütsü?
Ano takartemi Oset adokdak Mills, Factories tem lapokti ta atemshia alidang yongi Sarusajir aser Meshimetsür temi nungpanger ji oda tangar mesütsü agibo ajemajema lidi ta asüba ola angashiogo, aji agi asen lima nung oset yangludak kecha maka ta meteter. Dimapur nungbo pei ki asütsü atema sen agi Eta alitsü ao nung telongpur telok 2-3 nem Saru agütsürang alia bener arutsüsa atongteta lir, aji Sorkar tashi maitba agi masü saka asen nübur melongjemba ajanga ta ashitsü akok.
Ano osangtem angashidang aser tenük agi angudang kanga aoksar. Naga nunger tangari hau ta shitettsüsa tamale asayaba tsütsü lenir tajung atokogo, tanü putu nunga atoktsüsa Sempet tajung alir jenti lir sürnung, asen lenir ka sülen ka ta melentepba nübur anitsü Tsüngremi maongka agüjaka nübur ajungtsü kangabo aroka mebilemi pei kibong aser sosemdangsem ajungkettsü asoshi dang bilema inyakba yong kechisama ajak agi tanü asen nüburi tangar memenüp kümogo. Item ajak angudang temulung ayanga raksar saka koda asütsü to ta ashitsüsa dang akümer. Nagaland, state ngur tanü tashi Sports tsütsülen tangar den tokteptsüsa Sorkari tajungshiba balaka agütsüba angashia maru. Ano Dimapur nung aliba Stadium ya 1972- 73 meta tenzük, joko küm 46 shi aor, tang tashi odang tokja kar shingaia ola atoker mali. Tangar State tem mereprangli saka Manipur state nungi asayar tajung adokba ya par Sorkari junga anüpaluba yong südi ta angateter. Par State nungibo National/Intemational level nung asayar jenti adokogo. Ano Sorkari Sports nung kari konang nüngsang bener arutsüra sen lakh 8 agüja aliba 2018 küm nung 15 lakhs agütsütsü Sorkari sangdongba asenoki News paper nung nguogo. Konang ji odang angur masü saka rongsen, mapang jenti indoka training peria agiba ajanga lir. Süra asen Sorkaria koba tashi ka ajungshidar iba indang ola adokba tanü tashi kecha angazüka maru, telong nungdang meima agütsüba jagibo shinga balaka majangzüktsü südi.
Taküm 2018 Assam nungi tetsür asemteper Hema Das yimtsüng nung aluyimer kibong nungi küm 19 tekübok alima asemtepba tetoktepba nung Gold Medal anguba atema Assam Sorkari sen Lakh 50 agütsü, iba den la training junga agitsü atema ita shia sen 50 thousand tanga State kati agütsütsü nangzükba asenoki osangkaket nung nguogo. Ano kanga tepelatsü osang kaji, la ano asaya nungi ki tonga marudang Assam Chief Minister bai sempet aika bener lar tsürabur ki tonga oa semdangba osangkaket ajanga nguogo. Tesüiba mapang Dr.T.Ao Cotton College nung azüngdang Maharana Club nung dena küm 3 asaya aser Kolkata R.G.Kar Medical College nung azüngdang Mohan Bagan Club nung küm 9 asaya aser 1948 küm Olympic Games London nung asayadang mezüng Indian Team pa Captain ser oa asayaba asenok narongi angashia jembia aruogo. Iba sülen tanü tashi India nunger Olympic aser W orId Cup nung Foot ball asayaba otzü mali. Dr.T.Ao yamaji asen nübur rongnungi nüngtugu süaka tanü tashi pa tenüng nung asen lima nungbo asayadak tesem (Stadium) ka danga maka, aji dang masü pa tenüng nung Trophy-a ka tanga tenteta mali, ya asen Aor nükmeremtep ajanga asütsü südi ta bilemloker ati. Assam Sorkaribo pa ama nüngtugu asayar temoatsü aginuba agi Jakalabanda anasa Kaliabor District nung Dr.T.Ao Stadium ka parnok Minister/MLA/MP temi shilem agia sen aika indoka tesüngmangtsü tepor junga yangluogo, aser ibaji meshitetba sentong tajung nung Mr. Imkongnuken Industries & Commerce Minister tetushi tejaoker ama jaoka pelatepba mapang kü tenük agia nguogo. Asenokibo kecha hau ta mezüngshir saka tangari koma inyaka aru asenokia metettsü atema yangi tejangja proof atema Assam sorkari koda inyak aser takok angu documents densema adoktsür.

Tangarbo sen tera indoka mapa tulu inyakba angudang kanga temulung chia reprangogo. Ano iba Stadium tezülen Helicopter anendak tesem sadema yanglua liasü.