Temeimi tashi angadaktsür

Tashi angabaji tenlatem ajak dang tajungtiba ta Tsüngremi ashir. Tetezü, Tsüngremi asenoki tenlabaji masü Pa dang tashi angadaktsüner. Atangji, asenoki Tsüngrem asoshi tenlaba mapatem bilemdangra, Tsüngremi ashibabo mangar saka tenlabo kanga agütsür ta angatettsü. Aji shitak süra asenoki tenlabaji amajok asütsü. Tsüngremi tenlaba nung pelar masü saka tashi angaba nungang pelar. Asenoki ajia meteta lir saka tashi angatsübaji aiben makoker kechiyong ibaji kanga tasak lir. Iba jagi, asenok meyipa langka angutsü melira asenoki Tsüngrem danga aser nisung danga memeimtetter. Aiben asenoki shirang jungnüdang, takok ngunüdang mesüra temoatsü aginüdang Tsüngremi aginüba ama inyaker, ajisüaka ibajibo shitak tashi angaba masü. Ibajibo sen tera aginüba agi mesüra peii aginüba oset ka meshitsü tebilemba nung tanuri tsürabur dang tashi angaba amai lir. Item ama tashi angabajibo taila tashi angaba asütsü. Tashi angaba shitakbajibo temeim aketba temulungjang nungi adoktsü. Temulungjang nung Tsüngrem meimba shisatsü lira, tensa tia tamajung aruaka Tsüngremi ashiba angatsü aser alima tatidang tapu balala aruaka Tsüngrem meimba ajanga Tsüngremi ashiba angatsü aser tatidangtem nung metsüktsü. Yohan tapu 14:21 nung ashir, Nisung shibai kü ozüngtem benshir, pai kü dang tashi angar aser shibai ni meimdir kübuia pa meimtsü. Tetezü Tsüngremi ashiba angaa Pa ozüngtem benshibaji Tsüngrem meimba nungi adoker. Nisung kari Tsüngrembo meimer saka tashibo mangar ta süra, paji yazür asütsü. Asenok alima libalirobatem dena medemdangra, kodaser asenoki tsürabur meim nung parnok dang tashi mangatsü ? Asenoki asen tsürabur meimra, manganüyonga kechisüdirsüaka asenoki parnok dang tashi angatsü. Iba kasaji asenoki Tsüngremji chichiba meimra, koba ama tensa tia nung lidir liaka asenoki Pai ashi angatsü aser Pa sentsüwangshi asoshi inyaktsü. Atangji, nisung kari asenok dang, ” nenokia Tsüngrem meimer asü ?” ta asüngdangra, ‘hau’ ta melamelaa langzütsüa akok, saka ano asenok dang, ” nenokia Tsüngremi ashi angar asü ?” ta asüngdangra, iba tasüngdangba langzütsübajibo mapang agitsü südi. Aji oda, asenok mulungjang nung Tsüngremi ashiba angatsü atema atsüayong tenzükra, iba tamaitsüji asenok Tsüngrem nungi pilatsü tenzükba tamaitsü ta asenoki metetdi. ” Ni Tsüngrembo meimer saka Pai ashiba ajakbo angatsü makoker,” ta asenoki shira asenokji yazür asütsü. Asenok ajangzüktsüba mapa nung asenoki Tsüngremi ashi angatsü saka akoksatsüba mapa nung Tsüngremi ashi mangatsü ta masü. Asenok yanglusang kibur Tsüngrem ya asenoki tashi anganüdang angatsü aser manganüdang mangatsü ta asüba Tsüngrem masü. Asenok Tsüngrem chirtem, Pai asenok yanglu aser asenok Pa meyong, anungji asenok taküm aser kibong nung Paji kibur kümdaktsür Pa tashi angatsüba dak alaka nisungi pasasa tuluka ama bilema Tsüngrem nungi pilatsübaji tamashi aser lendong tulu asütsü. Asenok kari Tsüngrembo memeimer ser nung Pa dang tashi angar ama inyaktsüa akok, ajisüaka ibajibo tashi angar masü saka ozüngi ashi makok tashi angar asütsü. Iba amaji Tsüngrem memeim ser tashi angabaji nisung tsüngdang shitak aser temeshi ta sayunüba agi asütsü. Asenok sentepi aobaji mesüra arogo nung tenzükbaji Tsünmgremi ashi angar asütsüa akok saka ibaji Tsüngrem meimba agi tashi angar masütsüa akok.Tekümdangtsüji aji lir. Asenoki Tsüngrem dak amangyonga aser imlayonga mesüra tashi angar amai sayuyonga aser kotak tenyar amato meshiteta liaka aser shin o jembiaka temeim melira asenokji kecha masüa ta Laishiba nung shia aliba asenoki nguogo. Kodang asenok dak Tsüngrem meimba shisatsü melilir, idangjibo asenok tamang aser sarasadem takong asütsü. Asenok dak Tsüngrem o angatetnüba shisatsü malitsü aser sarasadema mesünüi dang akümtsü. Iba ama tanüla nung jangramatem takong tia ka nung asenok lira, asenokbo Tsüngrem temeim bushidi aser Pa meimdi. Iba jagiang, teti asenok Tsüngremi ashiba angaa pa den tesendaktep junga litettsü.