PM-i demonetization, GST aser CBI indanga jembitsüla: P Chidambaram

New Delhi, Yimpoksüi/November 17 (Agencies): Ato kilonser, Narendra Modi-i Congress Party dang Gandhi’er kibong nungi dang masü saka tangara ka Congress Tir shimang, ta jazükba langzüka tanü Congress lenir aser taoba mapang Union Finance Minister, P. Chidambaram-i Gandhi kibong züngsem masüba Congress Tirtem tenüng zünga metetdaktsü.
Twitter ajanga Chidambaram-i, Congress Tir shimbaren atema Ato kilonseri bilemtsüba atema pelar, ajisüaka pai demonetisation, Goods and Services Tax (GST), Rafale, CBI aser RBI indanga jembitsüla, ta ashi.
Congress Tirtemji Gandhi kibong nungi dang masü, ta shia Chidambaram-i, “Ato kilonser Modi nem ya bilemtetdaktsür: 1947 küm nungi tenzüka Congress Tirtemji- Acharya Kripalani, Pattabhi Sitaramayya, Purushottamdas Tandon, U. N. Dhebar, Sanjiva Reddy, Sanjivaiah … Kamaraj, Nijalingappa, C. Subramanian, Jagjivan Ram, Shankar Dayal Sharma, D.K. Barooah, Brahmananda Reddy, P.V. Narasimha Rao aser Sitaram Kesri nungera liasü,” ta ashi.
Paisa, “Ato kilonser Modi-i aluyimertem soseta asüba, mapa manguba, loktii nisung tepsetba, tanur aser tetsürtem tashiyim amshia raksatsüba, nashi kümzükba maparen aser kiralongrartemi amakba indanga jembitsü asü?” ta asüngdang.