BJP-i Madhya Pradesh assembly election atema manifesto saya

Bhopal (MP),Yimpoksüi/November 17 (Agencies): Madhya Pradesh assembly election atema tanü BJP-i party manifesto sayaogo; Union Finance Minister, Arun Jaitley aser Madhya Pradesh Chief Minister, Shivraj Singh Chouhan nati party indang vision document ji sayaja liasü.
Iba sentong nung jembidang Finance Minister, Arun Jaitley-i, linük ainba den medemdangra kanga kera ainba state rongnung Madhya Pradesh densema lir, aser tesüiba küm 15 nung BJP-i yimsüsüba mapang state tejakleni ogo, ta metetdaktsü.
BJP-i ashiba agi, vision document ya taruba küm pongu nung Madhya Pradesh renlokdaktsütsü atema asalentongtem lir.
BJP manifesto nung state nung küm shia lanurtem nem mapa lakh 10 agutsütsü aser lanurtemi shishilembaba mapa tenzüktsü atema maongka agutsütsü nangzüka lir.
Kasa manifesto nung shisaliok angati agutsütsü, tetsür kaketshirtem academic nung ajunger nem angati scooty agutsütsü, chiyungtsü wazüka ayutsü atema universities tasen amenoktsü, skill development aser rural tourism atema inyaktsü, GST Mitra scheme benoka inyaktsü, yimti shia nung encubation centre lapoktsütsü aser aluyimertem nem welfare schemes tasen agutsütsü nangzüka lir.
Ano market jenjang mejungi akum nunga aluyimertem tajangzük angutsü atema stabilisation fund sen crore 500 aliba nungi crore 2000 kümtsütsü parnoki nangzük.
BJP-isa industrial townships tasen tenzüktsü aser merchant welfare fund tenzüktsü nangzük.
Party-isa Vidya Upasna Smart School tasen 100 amenoktsü, mayor aliba yimtitem atema Metro project tenzüktsütsü, yimtsüngtem nung tajemtsü tzü atema ‘Nal-jal’ scheme tenzüktsü aser sorkar mapa inyakertem nem pay commission tasenba agutsütsü nangzükogo.